Xalq deputatlari Vobkent tumani Kengashining Mahalliy byudjet, tadbirkorlikni rivojlantirish va iqtisodiy islohotlar masalalari boʻyicha doimiy komissiyasi raisi Akmal Qurbonov boshchiligida deputatlar hamda tuman Kengashi kotibiyati bosh mutaxassislari ishtirokida Vobkent tumani iqtisodiyot va moliya boʻlimida oʻrganish ishlari olib borildi.

🔍 Oʻrganishlar xalq deputatlari tuman Kengashining navbatdagi sessiyasi kun tartibiga kiritilayotgan “Vobkent tumani mahalliy byudjetining 2026-yil I chorak ijrosi hamda daromadlar va xarajatlar rejasiga kiritilgan oʻzgartirishlar toʻgʻrisida”gi masala yuzasidan tashkil etildi.

📁 Jarayonda Oʻzbekiston Respublikasining Byudjet kodeksi hamda “Mahalliy davlat hokimiyati toʻgʻrisida”gi Qonun talablariga muvofiq, mahalliy byudjet ijrosi hisobotlarini xalq deputatlari Kengashlari tomonidan har chorakda koʻrib chiqish va tasdiqlash tartibi muhokama qilindi.

📈 Maʼlum qilinishicha, 2026-yilning I choragi yakunlariga koʻra, Vobkent tumani mahalliy byudjeti daromadlari 35,3 mlrd soʻmni tashkil etib, reja 117,7 foizga bajarilgan.

💰 Hisobot davrida mahalliy byudjet xarajatlari jami 41,4 mlrd soʻmni tashkil etgan boʻlib, shundan 21,5 mlrd soʻm yoki 52,1 foizi ijtimoiy soha xarajatlariga yoʻnaltirilgan.

🏠 Shuningdek, byudjet ijrosi jarayonida joriy yil I chorak daromadlar prognoz koʻrsatkichlari hamda xarajatlar rejasiga tegishli oʻzgartirishlar kiritish masalalari ham atroflicha koʻrib chiqildi.

🗳 Oʻzbekiston Respublikasi Vazirlar Mahkamasining tegishli yigʻilish bayonnomasi ijrosini taʼminlash maqsadida mahalliy byudjetlardagi past samarali xarajatlarni maqbullashtirish hamda byudjet tashkilotlarining ish haqi va ijtimoiy soliq toʻlovlari boʻyicha kutilayotgan xarajatlarini qoplash choralari belgilab olindi.

✔️ Oʻrganish yakunida mazkur masalalarni xalq deputatlari tuman Kengashining navbatdagi sessiyasida atroflicha muhokama qilish yuzasidan taklif va tavsiyalar ishlab chiqildi.