Zomin tumani hokimligi kichik majlislar zalida “Payshanba – yoshlar kuni” munosabati bilan yoshlar bilan ochiq muloqot uchrashuvi tashkil etildi. Unda Zomin tumani hokimi, tuman Kengashi deputati Alisher Abdug‘aniyev, faol yoshlar hamda tegishli mutasaddi tashkilotlar vakillari ishtirok etdi.

Mazkur uchrashuvdan ko‘zlangan asosiy maqsad — yoshlar bilan bevosita muloqotni kuchaytirish, ularning muammo va takliflarini tinglash, mavjud masalalarga yechim topish hamda yoshlarning jamiyat hayotidagi faolligini yanada oshirishdan iborat bo‘ldi.

Ochiq muloqot davomida yoshlar tomonidan ta’lim sifati, bandlik masalalari, tadbirkorlikni rivojlantirish, sport va madaniy yo‘nalishlarda imkoniyatlarni kengaytirish, axborot texnologiyalariga oid tashabbuslar yuzasidan qator taklif va mulohazalar bildirildi. Har bir murojaat atroflicha muhokama qilinib, ularning yechimi yuzasidan tegishli mutasaddilarga aniq topshiriqlar berildi.

Uchrashuv davomida jami 10 ta murojaat kelib tushdi. Shundan 5 tasi joyida hal etildi, qolgan 5 ta murojaat yuzasidan muddat belgilangan holda mas’ullarga topshiriqlar berildi.

Tuman hokimi o‘z so‘zida yoshlar — yurt kelajagi ekanini, ularning har bir tashabbusi doimo qo‘llab-quvvatlanishini alohida ta’kidladi. Shuningdek, yoshlarning bilim olishi, kasb-hunar egallashi hamda zamonaviy texnologiyalarni o‘zlashtirishi uchun yaratilayotgan imkoniyatlar haqida batafsil to‘xtalib o‘tildi.

Uchrashuv samimiy, ochiq va konstruktiv ruhda o‘tdi. Eng muhimi, yoshlar o‘z fikrlarini erkin bayon etish imkoniga ega bo‘lib, o‘zlarini eshitilayotganini his etdilar.