Xalq deputatlari Sardoba tumani Kengashi bosh mutaxassislari L.Toshquvvatov va S.Nomozov hamda tuman deputati B.Bekmurodov tomonidan Yangiqishloq mahalla fuqarolar yig‘ini hududida joylashgan tibbiyot muassasasida aholiga yaratilgan shart-sharoitlar bilan yaqindan tanishildi.
O‘rganish jarayonida tibbiyot muassasasining moddiy-texnik bazasi, fuqarolarga ko‘rsatilayotgan tibbiy xizmat sifati hamda bemorlar uchun yaratilgan sharoitlar ko‘zdan kechirildi. Shuningdek, tibbiyot xodimlari bilan suhbat o‘tkazilib, faoliyat davomida uchrayotgan mavjud muammolar muhokama qilindi.
O‘rganish natijasida muassasada ayrim zamonaviy tibbiy asbob-uskunalar yetarli emasligi aniqlandi. Mazkur holat aholiga ko‘rsatilayotgan tibbiy xizmat sifatini yana-da oshirish maqsadida moddiy-texnik ta’minotni mustahkamlash zarurligini ko‘rsatdi.
Tashrif yakunida aniqlangan kamchiliklarni bartaraf etish, muassasani zarur tibbiy jihozlar bilan bosqichma-bosqich ta’minlash hamda fuqarolar uchun munosib va sifatli tibbiy xizmat ko‘rsatishni yana-da takomillashtirish yuzasidan tegishli taklif va tavsiyalar bildirildi.