Vatan mahallasida aholini qiynayotgan kommunal muammolar joyida o‘rganildi

📁 Xalq deputatlari Uchtepa tumani Kengashi deputatlarining 24 talik tavsiyalari ijrosi yuzasidan hamda Kengashning haftalik ish rejasida belgilangan vazifalar doirasida Vatan mahallasida navbatdagi o‘rganish ishlari olib borildi. Mazkur mahallada 2 213 ta xonadon, 30 ta ko‘p qavatli uy mavjud bo‘lib, ularda 7 300 nafardan ortiq fuqaro istiqomat qiladi. Mahallaga "Centrum 24" boshqaruv servis kompaniyasi xizmat ko‘rsatadi. O‘rganishda xalq deputatlari Uchtepa tumani Kengashi kotibiyati mudiri Anvar Usmanov hamda kotibiyat bosh mutaxassisi Zarnigor Kuziyeva ishtirok etdi.

🗂 O‘rganish davomida O‘zbekiston Respublikasining "Ko‘p kvartirali uylarni boshqarish to‘g‘risida" 2019-yil 7-noyabrdagi O‘RQ–581-son Qonuni hamda O‘zbekiston Respublikasi Prezidentining "Ko‘p kvartirali uylarni boshqarishni yanada samarali tashkil qilish chora-tadbirlari to‘g‘risida" 2023-yil 15-avgustdagi PQ–278-son qarori va xalq deputatlari Uchtepa tumani Kengashi deputatlarining 24 talik tavsiyalari ijrosi yuzasidan mahallaga xizmat ko‘rsatayotgan "Centrum 24" boshqaruv servis kompaniyasi faoliyati tanqidiy tahlil qilindi. Xususan, maishiy chiqindilarni o‘z vaqtida olib chiqish, ko‘p qavatli uylarning kirish yo‘laklari (podyezdlari), yerto‘lalari, hovli hududlarining sanitariya holati, tungi yoritilishi hamda aholiga ko‘rsatilayotgan xizmatlar sifati atroflicha o‘rganildi.

🕯 O‘rganish jarayonida 43-uy, 27-xonadonda yashovchi fuqaro B.A. tomonidan maishiy chiqindilarni o‘z vaqtida olib chiqish hamda uyning tom qismidan suv o‘tayotgani yuzasidan murojaat bildirildi. Murojaat joyida ko‘rib chiqilib, boshqaruv servis kompaniyasi mas’ullariga aniqlangan kamchiliklarni qisqa muddatlarda bartaraf etish bo‘yicha tegishli topshiriqlar berildi.

📝 Murojaat ijrosi nazoratga olinib, amalga oshiriladigan ishlar yuzasidan mas’ullarga aniq vazifalar belgilandi.