Xalq deputatlari Marg‘ilon shahar Kengashi deputati A.Ermatov tomonidan 15-Zuhro saylov okrugi hududidagi ijtimoiy soha obyektlarini o‘rganish davomida 26-sonli maktabgacha ta’lim tashkilotida kuz-qish mavsumiga tayyorgarlik bilan bog‘liq muammolar aniqlandi.

360 o‘rinli mazkur muassasada ikkita isitish qozonining nosozligi hamda oshxonaga kirish qismidagi foye tomidan yomg‘ir suvlari o‘tayotgani ma’lum bo‘ldi. Ushbu holatlar sovuq mavsumda bolalar uchun zarur harorat va xavfsiz sharoitlarni ta’minlash masalasiga jiddiy e’tibor qaratishni talab etadi.

Aniqlangan kamchiliklarni bartaraf etish maqsadida deputat A.Ermatov Marg‘ilon shahar maktabgacha va maktab ta’limi bo‘limi boshlig‘i M.Alavitdinovga deputat so‘rovi yubordi.

So‘rovda nosoz isitish qozonlarini ta’mirlash yoki almashtirish, tom qoplamasini tiklash, shuningdek, muammolarni bartaraf etish bo‘yicha aniq muddatlarni belgilash va ko‘rilgan choralar yuzasidan yozma ma’lumot taqdim etish so‘ralgan.

Aniqlangan muammolarni qayd etish ishning bir qismi. Muhimi, ularning amaliy yechimiga erishishdir. Mazkur masala deputat nazoratiga olindi.