Xalq deputatlari Yangiobod tumani Kengashi Kotibiyati mudiri, deputat V.Xasanov tomonidan Do‘stlik mahallasi Pastkichaqir qishlog‘ida “Yangi O‘zbekiston” dasturi doirasida qurilgan artezian quduqni elektr energiyasi bilan ta’minlash maqsadida quyosh panellarini o‘rnatish ishlari jarayoni o‘rganildi.

O‘rganish davomida artezian quduqning umumiy holati, suv chiqarish tizimi, nasos qurilmalari hamda mazkur tizimni muqobil energiya manbai orqali ishlatish uchun amalga oshirilayotgan ishlar ko‘zdan kechirildi.

Jumladan, quduq uchun zarur elektr energiyasini quyosh energiyasi hisobidan ta’minlash maqsadida quyosh panellarini o‘rnatish jarayoni, ularning joylashtirilishi, tegishli qurilmalar bilan ulanishi va kelgusida suv chiqarish tizimining barqaror ishlashini ta’minlash imkoniyatlari bilan tanishildi.

Shuningdek, quyosh panellarini o‘rnatishda texnik talablar va xavfsizlik qoidalariga rioya etilishi, panellarni to‘g‘ri joylashtirish, nasos tizimi bilan uyg‘un ishlashini ta’minlash hamda o‘rnatish ishlarini sifatli yakunlash masalalariga alohida e’tibor qaratildi.

Mazkur loyiha amalga oshirilishi natijasida quyosh energiyasidan foydalanish orqali artezian quduqning ishlashini ta’minlash, elektr energiyasidan samarali foydalanish va Pastkichaqir qishlog‘i aholisini ichimlik suvi bilan ta’minlash imkoniyatlarini kengaytirish ko‘zda tutilmoqda.