Marg‘ilon shahrida mahallalarda qonun ustuvorligini ta’minlash, huquqbuzarliklarning barvaqt oldini olish va aholi o‘rtasida huquqiy madaniyatni yuksaltirishga qaratilgan deputatlik nazorati tadbirlari davom etmoqda.

O‘zbekiston Respublikasi Prezidentining PQ–406-son qarori, Oliy Majlis Senati Kengashining KQ–35–V-son qarori hamda mahalliy Kengash deputati faoliyatining eng muhim yo‘nalishlari bo‘yicha belgilangan 24 ta tavsiya ijrosi doirasida Xalq deputatlari Marg‘ilon shahar Kengashining 10-Bobur saylov okrugi deputati E.Tursunqulov tomonidan Yovqochar mahallasida deputatlik o‘rganishi o‘tkazildi.

O‘rganish jarayonida O‘zbekiston Respublikasining 2014-yil 14-maydagi “Huquqbuzarliklar profilaktikasi to‘g‘risida”gi O‘RQ–371-son Qonuni ijrosi, mahallada huquqbuzarlik va jinoyatchilikning oldini olish bo‘yicha amalga oshirilayotgan ishlar tahlil qilindi.

Xususan, hududda huquqbuzarlik sodir etilishiga sabab bo‘layotgan omillarni aniqlash va ularni bartaraf etish, fuqarolar o‘rtasida huquqiy targ‘ibot-tashviqot ishlarini olib borish, profilaktik nazoratga olingan shaxslar hamda muammoli oilalar bilan individual ishlash holatiga alohida e’tibor qaratildi.

Shuningdek, mahalladagi mavjud muammolarni faqat huquqbuzarlik sodir etilgandan keyin emas, balki uning oldini olish nuqtayi nazaridan o‘rganish, xavf guruhiga kiruvchi fuqarolar bilan manzilli ishlash va profilaktik tadbirlarning natijadorligini oshirish zarurligi qayd etildi.

Deputatlik o‘rganishi davomida aniqlangan holatlar yuzasidan mas’ullarga tegishli tavsiyalar berilib, huquqbuzarliklar profilaktikasiga oid qonun hujjatlari talablarining ijrosini kuchaytirish masalalari deputatlik nazoratiga olindi.

Bunday o‘rganishlar mahallalarda huquqbuzarliklarning sabab va shart-sharoitlarini barvaqt aniqlash, aholi bilan profilaktik ishlarni kuchaytirish hamda hududda osoyishtalikni ta’minlashga qaratilgan chora-tadbirlarning samaradorligini oshirishga xizmat qiladi.