Bolalar uchun xavfsiz va qulay muhit yaratish, ularning huquq va qonuniy manfaatlarini ta’minlash davlat siyosatining muhim yo‘nalishlaridan biridir. Shu bois mahallalarda bolalar uchun yaratilgan sharoitlarni o‘rganish ham deputatlik nazoratining dolzarb yo‘nalishlaridan biri hisoblanadi.

O‘zbekiston Respublikasining 2008-yil 7-yanvardagi O‘RQ-139-son “Bola huquqlarining kafolatlari to‘g‘risida”gi Qonunida bolaning hayoti, sog‘lig‘i, sha’ni va qadr-qimmatini himoya qilish, uning to‘laqonli va har tomonlama kamol topishi uchun zarur sharoitlarni yaratish davlat siyosatining ustuvor yo‘nalishlari sifatida belgilangan.

Mazkur qonun ijrosini joylarda o‘rganish, shuningdek, O‘zbekiston Respublikasi Prezidentining PQ–406-son qarori, Oliy Majlis Senati Kengashining KQ–35-V-son qarori hamda mahalliy Kengash deputati faoliyatining eng muhim yo‘nalishlari bo‘yicha belgilangan 24 ta tavsiya asosida Xalq deputatlari Marg‘ilon shahar Kengashi 15-Zuhro saylov okrugi deputati, Kengash kotibiyati mudiri A.Ermatov Zuhro mahallasi raisi B.Soliyeva hamda mahallaga biriktirilgan ijtimoiy xodim A.Abdurahimov hamrohligida hududdagi bolalar maydonchalarini ko‘zdan kechirdi.

O‘rganish davomida mahalladagi bolalar maydonchalarida bolalarning bo‘sh vaqtini mazmunli o‘tkazishi, xavfsiz harakatlanishi va dam olishi uchun yaratilgan sharoitlar holatiga e’tibor qaratildi.

Xususan, 49-ko‘p qavatli uy oldida joylashgan bolalar maydonchasida mavjud sharoitlar yetarli darajada emasligi aniqlandi. Mazkur holat bolalar uchun qulay va xavfsiz muhit yaratish nuqtayi nazaridan alohida e’tibor talab etishi qayd etilib, muammoni bartaraf etish masalasi deputatlik nazoratiga olindi.

O‘rganish yakunlari bo‘yicha aniqlangan kamchiliklarni bartaraf etish va bolalar maydonchasidan foydalanish uchun zarur sharoitlarni yaxshilash yuzasidan tegishli choralar ko‘rilishi nazoratga olindi.

Deputatlik nazoratining bunday shakli mahallalarda nafaqat mavjud muammolarni aniqlash, balki ularni amaliy hal etish, ayniqsa, bolalarning huquqlari va qonuniy manfaatlarini ta’minlashga xizmat qilishi bilan ahamiyatlidir.