Xalq deputatlari Qo‘qon shahar Kengashi kotibiyati mudiri A.Nosirov tomonidan Aziztepa mahallasi aholisi murojaati asosida O‘zbekiston Respublikasining 2022-yil 22-iyuldagi O‘RQ-784-sonli “Ichimlik suvi ta’minoti va oqova suvlarni chiqarib tashlash to‘g‘risida”gi Qonuni ijrosi yuzasidan soha mutaxassislari hamda mahalla faollari ishtirokida Aziztepa mahallasida joylashgan ichimlik suvi nasos stansiyasida o‘rganish ishlari olib borildi.

O‘rganish davomida ichimlik suvi ta’minoti tizimining amaldagi holati, nasos stansiyasining uzluksiz faoliyati, aholini sifatli ichimlik suvi bilan ta’minlash bo‘yicha amalga oshirilayotgan ishlar hamda Qonun talablariga rioya etilishi atroflicha ko‘rib chiqildi.

Xususan, belgilangan davlat standartlari, sanitariya qoidalari, normalari va gigiyena normativlariga muvofiq sifatli ichimlik suvi yetkazib berilishi, suv manbalari hamda ichimlik suvi tarmoqlarining sanitariya-muhofaza zonalariga rioya etilishi, mavjud texnik holat va aholiga ko‘rsatilayotgan xizmat sifati yuzasidan mas’ullar bilan muhokamalar o‘tkazildi.

O‘rganish jarayonida mahalla aholisining ichimlik suvi ta’minotini yanada yaxshilash bo‘yicha bildirgan taklif va murojaatlari ham tinglanib, mavjud muammolarni bartaraf etish yuzasidan tegishli mutasaddilar bilan fikr almashildi.

O‘rganish yakunlariga ko‘ra, Aziztepa mahallasida ichimlik suvi ta’minotini yanada yaxshilash maqsadida qo‘shimcha suv tarmog‘ini ulash ishlarini amalga oshirish hamda ushbu yo‘nalishdagi ishlarni belgilangan muddatlarda tashkil etish bo‘yicha zarur choralar ko‘rishga kelishib olindi.

Xalq deputatlari Qo‘qon shahar Kengashi