Shaxsga doir ma’lumotlarni himoya qilish — har bir fuqaroning huquqi

O‘zbekiston Respublikasining “Shaxsga doir ma’lumotlar to‘g‘risida”gi Qonuni 2019-yil 16-aprelda Qonunchilik palatasi tomonidan qabul qilinib, 2019-yil 21-iyunda Senat tomonidan ma’qullangan.

Mazkur Qonunning asosiy maqsadi shaxsga doir ma’lumotlarni yig‘ish, saqlash, qayta ishlash va ulardan foydalanish sohasidagi munosabatlarni huquqiy jihatdan tartibga solish, fuqarolarning shaxsiy hayoti daxlsizligini ta’minlash hamda ularning huquq va qonuniy manfaatlarini himoya qilishdan iborat.

Qonunga muvofiq, shaxsga doir ma’lumotlardan faqat qonuniy asoslarda foydalanilishi, ularning maxfiyligi va xavfsizligi ta’minlanishi lozim. Har bir fuqaro o‘ziga oid ma’lumotlarning qanday qayta ishlanayotganini bilish, ularga o‘zgartirish kiritishni yoki qonunchilikda belgilangan hollarda ularni o‘chirishni talab qilish huquqiga ega.

Shaxsga doir ma’lumotlarni himoya qilish – fuqarolarning konstitutsiyaviy huquqlarini ta’minlash, axborot xavfsizligini mustahkamlash hamda zamonaviy raqamli jamiyatda ishonchli huquqiy muhitni shakllantirishning muhim omillaridan biridir.