Mahalladagi muammolarni joyida aniqlash, aholi murojaatlarini manzilli hal etish va “mahalla yettiligi” faoliyatini samarali tashkil qilish — deputatlik nazoratining muhim yo‘nalishlaridan biri.

Xalq deputatlari Termiz shahar Kengashining 22-“Majnuntol” saylov okrugi deputati J.Xamroqulov hamda Kengash kotibiyati bosh mutaxassisi R.Mamashukurov “Majnuntol” mahallasida bo‘lib, mahalla faollari bilan uchrashdi. Mavjud muammolar va aholi bilan ishlash samaradorligi yuzasidan o‘rganish ishlari olib borildi.

O‘rganishlar mahalliy Kengash deputatlari faoliyati uchun belgilangan “24 ta eng muhim yo‘nalish” doirasida hamda O‘zbekiston Respublikasi Prezidentining 2026-yil 24-iyundagi PF–116-son Farmonida belgilangan vazifalar asosida tashkil etildi.
Muloqotda quyidagi masalalarga alohida e’tibor qaratildi:

▪️ “Mahalla yettiligi” a’zolari o‘rtasidagi hamkorlik va o‘zaro muvofiqlashtirish;

▪️ fuqarolar murojaatlarini ko‘rib chiqish va muammolarni xonadonbay o‘rganish;

▪️ mahalladagi ijtimoiy-iqtisodiy masalalarni aniqlash hamda ularning yechimi ustida ishlash;

▪️ mahalla raisining muvofiqlashtiruvchi faoliyati;

▪️ aholi bilan ochiq muloqot va jamoatchilik nazoratini kuchaytirish.

Shuningdek, deputat J.Xamroqulovning o‘tgan davr mobaynida mahalla bilan hamkorlikda amalga oshirgan ishlari ham tahlil qilindi.

Uchrashuv yakunida mahalla faollariga aholi murojaatlari bilan ishlashda manzillilik va shaffoflikni ta’minlash, muammolarni o‘z vaqtida hal etish hamda PF–116-son Farmonida belgilangan vazifalar ijrosini samarali tashkil qilish yuzasidan amaliy tavsiyalar berildi.

Deputatlik nazorati davom etadi: asosiy e’tibor — aholi muammolarini aniqlash, ularning yechimini izlash va ijro intizomini ta’minlashga qaratilgan.