Xalq deputatlari Termiz shahar Kengashi kotibiyati mudiri, deputat A.Ashurov, Kengashning 4-“Bo‘ston” saylov okrugi deputati G.Abramatova hamda Kengash kotibiyati bosh mutaxassisi A.Temirov tomonidan “Jayxun” mahallasida nazorat-tahlil tadbiri o‘tkazildi.

Tashrif davomida mahalla hududidagi obodonlashtirish, ko‘kalamzorlashtirish va tozalik holati joyiga chiqqan holda ko‘zdan kechirildi. Xususan, ko‘chalar va umumiy foydalanishdagi hududlarning sanitariya holati, yashil hududlarni saqlash hamda obodonlashtirish ishlari holatiga e’tibor qaratildi.

Shuningdek, obodonchilik ishlari yuzasidan fuqaro bilan suhbat o‘tkazilib, aholini qiynayotgan masalalar, hududni yanada obod va ko‘rkam qilish bo‘yicha taklif hamda mulohazalari tinglandi.

Mazkur nazorat-tahlil tadbiri mahalliy Kengash deputatlari faoliyati uchun belgilangan “24 ta eng muhim yo‘nalish” mezonlari asosida tashkil etildi.

O‘rganish davomida aniqlangan muammolar deputatning murojaatlar daftariga qayd etilib, ularni bartaraf etish yuzasidan tegishli tashkilotlarga deputatlik so‘rovi yuborish belgilab olindi.