“Orolbo‘yi uchun ekologik mas’uliyat — har birimizdan boshlanadi”

“Orolbo‘yi — bu faqat bugungi kunimiz emas, farzandlarimiz kelajagi hamdir. Shuning uchun tabiatni asrash, yashil hududlarni ko‘paytirish va ekologik madaniyatni yosh avlod ongiga singdirish har birimizning mas’uliyatimizdir.”
Xalq deputatlari Taxiatosh tumani Kengashiga O‘zbekiston Ekologik partiyasidan saylangan deputat Aralbaeva Inkar Karlibayevna.

Prezident Shavkat Mirziyoyevning Qoraqalpog‘istonga tashrifi davomida Orolbo‘yi hududining ekologik holatini yaxshilash, hudud iqlimiga mos intensiv bog‘larni rivojlantirish va yashil hududlarni kengaytirish masalalariga alohida e’tibor qaratildi. Xususan, Kegeyli tumanidagi zamonaviy intensiv bog‘ tajribasini butun Qoraqalpog‘iston bo‘ylab kengaytirish, intensiv bog‘lar maydonini 10 ming gektarga yetkazish rejalashtirilgani qayd etildi.

Aralbaeva Inkar Karlibayevnaning ta’kidlashicha, Orolbo‘yida ekologik barqarorlikni ta’minlash faqat yirik loyihalar bilan emas, balki har bir hududda ekologik madaniyatni shakllantirishdan boshlanadi.

“Deputat hamda maktab rahbari sifatida men ekologik tarbiyaning naqadar muhimligini yaxshi anglayman. O‘quvchiga tabiatni asrashni, suv va yer resurslaridan oqilona foydalanishni bugundan o‘rgatsak, ertaga ekologik mas’uliyatni his qiladigan avlodni tarbiyalagan bo‘lamiz.”
Bugungi kunda Orolning qurigan tubida yashil qoplamalar yaratish, cho‘llanishga qarshi kurashish va mahalliy iqlimga mos o‘simliklarni ko‘paytirish bo‘yicha ishlar davom ettirilmoqda.

🌱 Ekologik barqarorlik — bir kunlik tadbir emas. Bu kelajak avlod oldidagi doimiy mas’uliyatdir.

— Aralbaeva Inkar Karlibayevna
Xalq deputatlari Taxiatosh tumani Kengashiga O‘zbekiston Ekologik partiyasidan saylangan deputat.