Xalıq deputatları Bozataw rayonlıq Keńesi sekretariatınıń baslıǵı A.Ibragimov tárepinen rayondaǵı eń shetki aymaqlardan biri bolǵan "Shaxaman" máhállesindegi Mektepke shekemgi hám mektep bilimlendiriw bólimine qaraslı 13-sanlı ulıwma orta bilim beriw mektebinde jańa 2026-2027-oqıw jılına tayarlıq jumıslarınıń házirgi jaǵdayı úyrenildi.
Úyreniw barısında mekteptiń oqıw jılına tayarlıǵı, klass xanalarınıń jaǵdayı, oqıwshılar ushın jaratılǵan sharayatlar, oqıw-qollanba hám kórgizbeli materiallar menen támiyinleniwi, sonıń menen birge bilimlendiriw procesin sapalı jolǵa qoyıw boyınsha alıp barılıp atırǵan jumıslarǵa itibar qaratıldı.
Súwrette kórinip turǵanınday, mektepte oqıwshılardı jańa oqıw jılına kóterińki keypiyatta kútip alıw, klass xanaların zamanagóy oqıw quralları hám kerekli materiallar menen támiyinlew boyınsha tayarlıq jumısları alıp barılǵan. Oqıwshılar ushın qolaylı hám mazmunlı bilimlendiriw ortalıǵın jaratıwǵa ayrıqsha itibar berilgen.
Eń quwanıshlısı, bul tayarlıq jumısları elimizdiń ullı bayramı - Ózbekstan Respublikası ǵárezsizliginiń 35 jıllıǵı keń túrde belgilenip atırǵan quwanıshlı dáwirge tuwra kelmekte. "Bir Watan, bir xalıq bolıp, jańa turmıs hám keleshek quramız!" degen ideya tiykarında jas áwladqa sapalı bilim beriw, olardıń hár tárepleme rawajlanıwı ushın sharayat jaratıw mámleketlik siyasattıń baslı baǵdarlarınan biri bolıp qalmaqta.
Mektep - jas áwladtıń bilim alıp, dúnyaqarasın keńeytetuǵın, keleshekke isenimli qádem taslaytuǵın bilim orayı. Sonlıqtan bilimlendiriw mákemeleriniń jańa oqıw jılına tayarlıǵın sapalı shólkemlestiriw, oqıwshılar ushın jaqsı sharayat jaratıw hám mekteptiń materiallıq bazasın jáne de bekkemlew boyınsha jumıslardı izbe-iz dawam ettiriw áhmiyetli.
Úyreniw nátiyjeleri boyınsha anıqlanǵan máselelerge tiyisli usınıslar berilip, jańa oqıw jılın joqarı dárejede baslap alıw boyınsha tiyisli jumıslardı dawam ettiriw belgilendi.
35 jıllıq Ǵárezsizligimiz - ullı jetiskenlikler, jarqın keleshek hám jańa mápler dáwiri! Sapalı bilim - mámleket rawajlanıwınıń bekkem tiykarı!