Xalq deputatlari Bo‘stonliq tumani Kengashning 2026-yilga mo‘ljallangan ish rejasiga muvofiq O‘zbekiston Xalq demokratik partiyasidan saylangan deputat J.Sadirov va kotibiyat xodimi N.Kurganova tomonlaridan tumanning “Do‘stlik” mahallasida joylashgan “Chorbog‘” oilaviy poliklinika bemor va tibbiy xodimlar uchun yaratilgan sharoitlar hamda bepul dori-darmonlar bilan ta’minlanish holati o‘rganildi.

🔻O‘rganish davomida poliklinikaning mavjud moddiy-texnik bazasi, tibbiy xonalarning holati, bemorlar uchun yaratilgan qulayliklar hamda tibbiy xodimlarning mehnat faoliyati uchun zarur sharoitlar ko‘zdan kechirildi. Aniqlangan holatga ko‘ra, tibbiy muassasada dori-darmonlar yetarli miqdorda mavjud bo‘lib, bemorlarga belgilangan tartibda bepul dori vositalarini yetkazib berish ishlari yo‘lga qo‘yilgan. Dori-darmonlarni saqlash va ulardan maqsadli foydalanish holati ham o‘rganilib, aholining zarur tibbiy vositalarga bo‘lgan ehtiyojini qondirishga e’tibor qaratilayotgani qayd etildi.

Shuningdek, poliklinikada bemorlar uchun zarur sharoitlar yaratilgani, kutish va qabul jarayonlarida qulayliklar mavjudligi o‘rganildi. Tibbiy xizmat olish uchun murojaat qilgan fuqarolar bilan suhbatlashilib, ularning muassasadagi xizmat ko‘rsatish sifati, tibbiy xodimlarning munosabati va yaratilgan sharoitlar yuzasidan fikrlari tinglandi. Muloqotlar davomida bemorlar tomonidan tibbiy xizmat sifati, dori-darmonlar bilan ta’minlanish yoki yaratilgan sharoitlar yuzasidan e’tiroz va jiddiy shikoyatlar bildirilmadi. Fuqarolarga ko‘rsatilayotgan tibbiy xizmatlar bo‘yicha qo‘shimcha takliflar ham o‘rganildi.

O‘rganish jarayonida tibbiy xodimlar bilan ham suhbat o‘tkazilib, ularning ish faoliyati uchun yaratilgan sharoitlar, ish joylarining jihozlanganlik holati va kundalik faoliyatida duch kelayotgan masalalari tinglandi. Tibbiy xodimlar uchun zarur ish sharoitlari yaratilgani, muassasada xizmat vazifalarini bajarish uchun tegishli imkoniyatlar mavjudligi qayd etildi.

🔻Deputat tomonidan bepul dori-darmon vositalari bilan ta’minlash masalasi aholi uchun ijtimoiy jihatdan muhim ekani qayd etilib, mavjud dori vositalarining uzluksizligi, ularni belgilangan tartibda bemorlarga yetkazib berish va hisobini to‘g‘ri yuritishga alohida e’tibor qaratish zarurligi bildirildi. Umuman, o‘rganish natijasida oilaviy poliklinikada bemorlar va tibbiy xodimlar uchun yaxshi sharoitlar yaratilgani, zarur dori-darmonlar yetarli ekani hamda murojaat qilgan bemorlar tomonidan e’tirozlar bildirilmagani qayd etildi