Hududlarda tadbirkorlikni qo‘llab-quvvatlash, yangi ish o‘rinlari yaratish, yoshlarni kasb-hunarga yo‘naltirish hamda ularning bandligini ta’minlash masalalari mahalliy Kengashlar deputatlari faoliyatining muhim yo‘nalishlaridan biridir.

O‘zbekiston Respublikasi Prezidentining PQ-406-son qarori, Senat Kengashining KQ-35-V-son qarori ijrosini ta’minlash hamda mahalliy Kengash deputati faoliyatining muhim yo‘nalishlari bo‘yicha belgilangan 24 ta tavsiyadan kelib chiqib, 8-Maorif saylov okrugi deputati Abidov Behzod Muxamatovich va kotibiyat bosh mutaxassislari Z.Yakubova va N.Akbarova tomonidan Maorif mahallasida yoshlar yetakchisi faoliyati o‘rganildi.

Maorif mahallasida ayni paytda 6210 nafar aholi istiqomat qiladi. Hududda 1606 ta oila va 1029 ta xonadon mavjud bo‘lib, 0–30 yoshdagi yoshlar soni 2582 nafarni tashkil etadi.

O‘rganish davomida yoshlarni bo‘sh vaqtini mazmunli tashkil etish, ularni zamonaviy kasb va ko‘nikmalarga yo‘naltirish borasidagi ishlar ham tahlil qilindi. Jumladan, 1620 nafar yosh sportning 5 ta muhim tashabbus yo‘nalishlariga jalb etilgan. 3 nafar yosh Raqamli texnologiyalar markazida ta’lim olish uchun yo‘naltirilgan bo‘lsa, 7 nafar yosh kasb-hunarga o‘qitilgan. Shuningdek, 6 nafar yosh xorijiy tillarni o‘rganish kurslariga jalb etilgan.

Yoshlarning tadbirkorlik tashabbuslarini qo‘llab-quvvatlashga ham alohida e’tibor qaratilmoqda. Xususan, 3 nafar yoshga nonvoychilik va tikuvchilik yo‘nalishlarida faoliyat olib borishi uchun imtiyozli kredit ajratilgan.

Deputatlik nazorati doirasida hududdagi yangi tashkil etilgan “Rajabova Osiyo” YATT faoliyati ham joyiga chiqqan holda o‘rganildi.

Mazkur tadbirkorlik subyekti tomonidan bir nechta yo‘nalishda xizmatlar yo‘lga qo‘yilgani e’tiborga molik. Jumladan, yoshlarni xorijiy tillarga o‘qitish, notarius xizmati, Paynet hamda tezkor pochta xizmatlari kabi yo‘nalishlarda faoliyat tashkil etilgan.

Eng muhimi, mazkur tadbirkorlik faoliyati natijasida 15 nafar fuqaro doimiy ish bilan ta’minlangan. Shu bilan birga, Maorif mahallasidagi yoshlar ham ushbu o‘quv kurslariga jalb etilib, zamonaviy bilim va ko‘nikmalarni egallash imkoniyatiga ega bo‘lmoqda.

O‘rganish jarayoni shuni ko‘rsatmoqdaki, deputatlik nazorati faqat mavjud holatni o‘rganish bilan cheklanmaydi. Uning asosiy mazmuni hududdagi muammolarni aniqlash, mavjud imkoniyatlardan samarali foydalanish, yoshlarning tashabbuslarini qo‘llab-quvvatlash, ularni kasb-hunar va zamonaviy bilimlarga yo‘naltirish hamda aholi bandligini ta’minlashga ko‘maklashishdan iborat.

Xalq deputatlari Marg‘ilon shahar Kengashi deputatlari tomonidan hududlarda tadbirkorlikni rivojlantirish, yoshlarni qo‘llab-quvvatlash, ularning bandligini ta’minlash va yangi ish o‘rinlari yaratish masalalarini deputatlik nazorati asosida o‘rganish ishlari davom ettiriladi.