Xalq deputatlari Qo‘qon shahar Kengashi deputati I.Fayzullayev tomonidan 19-"Saodat" saylov okrugiga qarashli “A.Navoiy” mahallasida bo‘lib, hududdagi “mahalla yettiligi” faoliyati hamda aholini qiynab kelayotgan muammolarni o‘rganish ishlari olib borildi.

O‘rganish davomida “Yoshlik” ko‘chasi 22a-uyda istiqomat qiluvchi, ijtimoiy himoyaga muhtoj N.Mamadaliyeva oilasiga ko‘rsatilgan amaliy yordamlar va ularning natijadorligi joyida ko‘zdan kechirildi.

Amalga oshirilgan ishlar natijasida oilaning bandligini ta’minlash va daromad manbaini yaratish maqsadida N.Mamadaliyevaga tadbirkorlik faoliyatini yo‘lga qo‘yish uchun 20 million so‘m miqdorida imtiyozli ssuda ajratildi. Bugungi kunda u o‘z uyida tikuvchilik faoliyati bilan shug‘ullanib, oilasi uchun barqaror daromad manbaiga ega bo‘lgan.

Shuningdek, oilaning farzandi salomatligini tiklash maqsadida “Saxovat va ko‘mak” jamg‘armasi orqali 30 million so‘m mablag‘ ajratilib, zarur tibbiy jarrohlik amaliyoti o‘tkazildi. Natijada bolaning sog‘lig‘i tiklanib, oila uchun katta yengillik yaratildi.

Uchrashuv davomida mahalla faollari va fuqarolar bilan suhbat o‘tkazilib, ehtiyojmand oilalarni qo‘llab-quvvatlash, ularning bandligini ta’minlash hamda kambag‘allikni qisqartirish borasida amalga oshirilayotgan ishlar muhokama qilindi.

Ta’kidlanganidek, “mahallabay ishlash” tizimi doirasida ehtiyojmand oilalarni har tomonlama qo‘llab-quvvatlash, ularni ijtimoiy himoya qilish hamda turmush darajasini yaxshilashga qaratilgan ishlar izchil davom ettirilmoqda.

Xalq deputatlari Qo‘qon shahar Kengashi