🔹Xalq deputatlari Margʻilon shahar Kengashining “Ijtimoiy soha, yoshlar siyosati, madaniyat va sport masalalari bo‘yicha” doimiy komissiyasi yig‘ilishida shaharda xotin-qizlarni qo‘llab-quvvatlash borasida amalga oshirilayotgan ishlar tahlil qilindi.

🔹Yig‘ilish davomida shahar xotin-qizlar bo‘limi boshlig‘i G.Jo‘raboeva hisobot bilan ishtirok etib, o‘tgan davr mobaynida xotin-qizlarning ijtimoiy-iqtisodiy faolligini oshirish, ularni tadbirkorlikka jalb etish hamda huquq va qonuniy manfaatlarini himoya qilish yo‘nalishida amalga oshirilgan ishlar haqida ma’lumot berdi.

Bugungi kunda xotin-qizlarni qo‘llab-quvvatlash ayniqsa ularning bandligini ta’minlash, o‘z biznesini yo‘lga qo‘yishiga ko‘maklashish masalalariga alohida e’tibor qaratilmoqda. Shu maqsadda joylarda turli o‘quv-seminarlar, kasb-hunar kurslari tashkil etilib, imtiyozli kreditlar ajratish orqali xotin-qizlarning tadbirkorlik tashabbuslari qo‘llab-quvvatlanmoqda.

Hisobotda, shuningdek, ijtimoiy himoyaga muhtoj, nogironligi bo‘lgan yoki og‘ir turmush sharoitidagi xotin-qizlar bilan ishlash, ularning muammolarini aniqlash va manzilli yordam ko‘rsatish borasida amalga oshirilayotgan chora-tadbirlar ham alohida qayd etildi.

🔹Komissiya a’zolari tomonidan mazkur yo‘nalishda erishilgan natijalar bilan bir qatorda mavjud muammolar ham muhokama qilinib, xotin-qizlarning huquqlarini himoya qilish, ularni ish bilan ta’minlash va tadbirkorlikka keng jalb etish borasidagi ishlarni yanada kuchaytirish yuzasidan tegishli tavsiyalar berildi.

🔹Yig‘ilish yakunida ushbu sohada olib borilayotgan ishlar samaradorligini oshirish, hamkor tashkilotlar bilan tizimli ishlarni kengaytirish hamda xotin-qizlarning jamiyatdagi faolligini yanada kuchaytirish zarurligi ta’kidlandi.