“Yurt Obodligi – Mahalladan Boshlanadi” 

“Yurt obodligi – avvalo, mahalladan boshlanadi” shiori ostida o‘tkazilayotgan umumxalq xayriya hashari Termiz tumanida keng ko‘lamda davom etmoqda. Hashar tadbirlarida mahallalardagi yashil hududlar tartibga keltiriladi, daraxt va butalarga agrotexnik ishlov beriladi, yo‘l bo‘ylaridagi chiqindilar yig‘ishtiriladi. Shu bilan birga, maktablar, bog‘chalar, tibbiyot muassasalari, ko‘p qavatli uylar atrofi va jamoat joylarida ham obodonlashtirish ishlari olib borilmoqda.

Hashar tadbirlarida mahalla faollari, yoshlar, nuroniylar, turli tashkilot va muassasalar xodimlari bilan bir qatorda Termiz tuman Kengashi deputatlari ham faol ishtirok etdi. Deputatlar mahallalardagi obodonlashtirish ishlarida bevosita qatnashib, hududlarni tartibga keltirish, chiqindilarni yig‘ishtirish va yashil maydonlarni parvarishlashda o‘z hissalarini qo‘shdilar.

Bunday tadbirlar mahallalarning ko‘rinishini yaxshilab, aholi o‘rtasida birdamlik va hamjihatlikni mustahkamlashga xizmat qilmoqda. Natijada Termiz tumanidagi mahallalar yanada tartibli, ozoda va chiroyli qiyofa kasb etmoqda.