Prezident topshiriqlari ijrosi: Termiz tumani hokimi yoshlar bilan uchrashuv o‘tkazdi

Prezidentimizning joriy yil 24-fevral kuni yoshlar bilan ularning tashabbuslarini qo‘llab-quvvatlash bo‘yicha qo‘shimcha imkoniyatlarga bag‘ishlangan muloqotida mamlakatimizda har haftaning payshanba kuni vazirlik, idora va hokimliklarda "Yoshlar kuni" bo‘lishi belgilandi (https://t.me/Press_Secretary_Uz/7038). Sohaga mas’ul rahbarlarga mahalla, maktab va texnikumlarga borib, yoshlarni eshitish va muammosini hal qilish vazifalari yuklandi. 

Mazkur topshiriqlar ijrosini ta’minlash maqsadida bugun Termiz tumani hokimi Shuxrat Qalandarov tuman yoshlari bilan ochiq muloqot o‘tkazdi. Unda tuman prokurori Yodgor Bozorov, xalq deputatlari Termiz tuman Kengashi kotibiyat mudiri A.Avliyakulov, deputatlar Sh.Norsayev va A.Abdullayev hamda sohaga mas’ul rahbarlar ishtirok etdi.

Uchrashuv davomida yoshlarning taklif va tashabbuslari, ularni qiynayotgan muammolar tinglandi. Tuman rahbari tomonidan har bir masala alohida ko‘rib chiqilib, ularning yechimini ta’minlash yuzasidan mas’ullarga aniq vazifalar belgilab berildi.

Muloqot yakunida ishsiz bo‘lgan, o‘z tadbirkorlik faoliyatini yo‘lga qo‘yib, o‘zini o‘zi band qilish istagini bildirgan 50 nafar yoshlarga turli asbob-uskuna va jihozlar topshirildi. Bu esa ularning daromadli faoliyat boshlashiga, bandligini ta’minlashga xizmat qiladi.

Bu kabi "Yoshlar kuni" tadbirlari har hafta payshanba kuni tumanning barcha hududlarida o‘tkazib boriladi.