Mazkur o‘rganish mahalliy Kengash deputatlari faoliyatining “Eng muhim 24 ta yo‘nalishi” doirasida tashkil etilib, O‘zbekiston Respublikasining “Oilaviy tadbirkorlik to‘g‘risida”gi 2012-yil 26-apreldagi O‘RQ-327-son Qonuni asosida amalga oshirildi.

O‘rganish davomida mahalla hududida faoliyat yuritayotgan YaTT “SARDOR JO‘RAYEV” faoliyati ko‘zdan kechirildi. Tadbirkorga hokim yordamchisi ko‘magida qandolat mahsulotlari ishlab chiqarish va yetkazib berish xizmatini yo‘lga qo‘yish maqsadida 100 million so‘m miqdorida imtiyozli kredit ajratilgan.

Bugungi kunda mazkur mablag‘lar hisobidan tadbirkorlik faoliyati yo‘lga qo‘yilib, ishlab chiqarish hajmi va xizmat ko‘rsatish imkoniyatlari kengaytirilgan. Eng muhimi, tadbirkor o‘z daromad manbasini shakllantirish bilan bir qatorda, mahalladagi 2 nafar ishsiz fuqaroni doimiy ish bilan ta’minlagan.

Ushbu misol imtiyozli kreditlarning to‘g‘ri yo‘naltirilishi nafaqat yangi tadbirkorlik subyektlarini rivojlantirish, balki yangi ish o‘rinlari yaratish, aholi bandligini ta’minlash va oilalar daromadini oshirishga xizmat qilayotganini ko‘rsatmoqda.

Deputatlik nazorati doirasidagi bunday o‘rganishlar orqali kredit mablag‘laridan maqsadli foydalanish, ularning amaliy natijadorligini baholash hamda mahallalarda tadbirkorlikni rivojlantirishga qaratilgan ishlar izchil davom ettiriladi.