Xalq deputatlari Qumqo‘rg‘on tuman Kengashining 19-"Munchoqtepa" saylov okrugidan saylangan deputat Sh.Mamadiyev hamda tuman Kotibiyati bosh mutaxassisi T.Gulmatov okrug hududidagi "Hunarmandlar" mahallasida bo‘lib, amalga oshirilayotgan ishlar bilan joyida tanishdi.
O‘rganishlar davomida ichki ko‘chalarni obodonlashtirish, yo‘l yoqalari va ariq-zovurlarni tozalash, daraxtlarga shakl berish va oqlash, ko‘kalamzorlashtirish, eski devorlarni buzib, o‘rniga yangi devorlar qurish kabi ishlar ko‘zdan kechirildi.
Shuningdek, "Obod xonadon – obod ko‘cha – obod mahalla" tamoyili asosida olib borilayotgan ishlar, "mahalla yettiligi" faoliyati, aholi tomorqalaridan samarali foydalanish, jamoatchilik faolligini oshirish hamda fuqarolarni obodonlashtirish ishlariga keng jalb etish bo‘yicha amalga oshirilayotgan chora-tadbirlar ham muhokama qilindi.
Obod va fayzli mahalla — yurt taraqqiyoti, aholi farovonligi hamda birdamligining muhim asosidir.