Xalq deputatlari Qo‘qon shahar Kengashining "Ijtimoiy soha, yoshlar siyosati, madaniyat va sport masalalari bo‘yicha" doimiy komissiyasi a’zolari tomonidan shahardagi 7-son Bolalar musiqa va san’at maktabida milliy raqs yo‘nalishi bo‘yicha tashkil etilgan mashg‘ulotlar bilan yaqindan tanishildi.

O‘rganish davomida komissiya a’zolari o‘quv xonasida bo‘lib, o‘quvchilarning amaliy mashg‘ulotlarini kuzatdilar hamda ularga yaratilgan shart-sharoitlar bilan tanishdilar.

Mashg‘ulotlar jarayonida bolalarga milliy raqs san’atining o‘ziga xos jihatlari, sahna madaniyati, harakatlar uyg‘unligi va ijro mahoratini shakllantirish bo‘yicha berilayotgan ta’lim sifati yuzasidan fikr almashildi.

Shuningdek, o‘quvchilarning iste’dodini rivojlantirish, ularni turli tanlov va madaniy tadbirlarga tayyorlash, mashg‘ulotlar samaradorligini yanada oshirish hamda mavjud sharoitlarni takomillashtirish bo‘yicha taklif va tavsiyalar bildirildi.

Komissiya a’zolari yosh avlodni milliy qadriyatlar ruhida tarbiyalash, milliy raqs san’atiga bo‘lgan qiziqishni oshirish va iste’dodli o‘quvchilarni qo‘llab-quvvatlash yo‘nalishidagi ishlarni izchil davom ettirish muhimligini ta’kidladilar.

Xalq deputatlari Qo‘qon shahar Kengashi