DEPUTAT TOMONIDAN YANGICHEK MAHALLASIDA MANZILLI O‘RGANISH O‘TKAZILDI 

  Xalq deputatlari Quva tuman Kengashi deputati Y.Axmadaliyev hamda Kengash
kotibiyati bosh mutaxassisi M.To‘xtasinov tomonidan Yangichek mahalla fuqarolar
yig‘inida manzilli o‘rganish ishlari olib borildi. O‘rganish davomida asosiy
e’tibor tuman Kengashining navbatdagi sessiyasi kun tartibiga kiritiladigan
masala doirasida “Farg‘ona tozalik sanitar servis” MChJ tuman filiali tomonidan
mahallada olib borilayotgan ishlar holati, mavjud muammolarni aniqlashga
qaratildi. 

Ma’lumot o‘rnida, Yangichek mahallasida jami 6 ta ko‘cha mavjud
bo‘lib, ushbu o‘rganish doirasida deputat tomonidan Bahor ko‘chasi
qamrab olindi. 

Jumladan, deputat Bahor ko‘chasi ko‘cha boshi U.Ibragimov bilan
uchrashib, birgalikda ko‘cha muammolarini fuqarolarning taklif va
murojaatlarini o‘rgandi. Muloqotlar davomida eng dolzarb muammo sifatida “toza
hudud sanitar servis” tashkiloti tomonidan maishiy chiqindilarni o‘z vaqtida
olib chiqib ketilmayotganligi ko‘tarildi. 

Shuningdek, mazkur ko‘chada joylashgan 89 ta xonadonning yashash sharoiti,
infratuzilma holati hamda kommunal xizmatlar sifati yuzasidan fikr almashildi. 

O‘rganish yakunida bildirilgan murojaatlar “Deputatning ko‘cha aylanish
daftari”ga qayd etilib, ularning yechimini ta’minlash bo‘yicha mas’ul
tashkilotlar bilan hamkorlikda amaliy choralar ko‘rilishi hamda ijrosi
deputatlik nazoratida olib borilishi belgilandi.