Ushbu o‘rganish jarayonida, avvalo, mahalla aholisi bilan bevosita muloqot qilinib, ularni qiynayotgan dolzarb muammolar, murojaatlar va takliflar atroflicha tinglandi. Fuqarolar tomonidan ko‘tarilgan masalalar asosan ichki yo‘llarning holati, ichimlik suvi ta’minoti, elektr energiyasi uzilishlari, hududni obodonlashtirish hamda ijtimoiy infratuzilmani yanada yaxshilash bilan bog‘liq ekani aniqlandi.

Shuningdek, mahalla hududidagi mavjud infratuzilma obyektlari ko‘zdan kechirilib, ularning bugungi holati tanqidiy tahlil qilindi. Ayrim yo‘nalishlarda amalga oshirilishi lozim bo‘lgan ishlar bo‘yicha aniq taklif va tavsiyalar ishlab chiqildi.

Aniqlangan kamchilik va muammolar yuzasidan tegishli tashkilot va mas’ul idoralarga deputat so‘rovlari yuborilib, ularni bartaraf etish choralarini ko‘rish bo‘yicha amaliy ishlar boshlab yuborildi. Har bir murojaat nazoratga olinib, ijrosi yuzasidan muntazam monitoring olib borilishi ta’minlanadi.

Mazkur o‘rganishlar aholi farovonligini oshirish, hudud infratuzilmasini yanada rivojlantirish hamda fuqarolarning muammolarini joyida hal etishga qaratilgan amaliy ishlarning uzviy davomi hisoblanadi.