Xalq deputatlari tuman Kengashi raisi X.Raximov tomonidan og‘ir mahalla toifasiga kiritilgan Yoshlik mahallasida amalga oshirilayotgan obodonlashtirish va infratuzilmani yaxshilash ishlarining borishi o‘rganildi. Tashrif davomida mahallada ichki yo‘llarni ta’mirlash hamda aholi uchun qulay va xavfsiz harakatlanish sharoitlarini yaratish borasida olib borilayotgan ishlar holati bilan yaqindan tanishildi. O‘rganish jarayonida mazkur mahallada jami 8,3 kilometr ichki yo‘llarni asfaltlash rejalashtirilgani ma’lum qilindi. Ayni paytda ichki yo‘llarni ta’mirlash ishlari doirasida 5,8 kilometr masofadagi yo‘l qismida yer ishlari to‘liq bajarilib, asfalt qoplamasini yotqizish uchun tayyor holatga keltirilgani aniqlandi. Tuman Kengashi raisi yo‘l qurilishi ishlarining sifatli va belgilangan muddatlarda amalga oshirilishi muhimligini ta’kidlab, mutasaddi tashkilotlar va mas’ullarga qurilish jarayonlarini doimiy nazoratda ushlash yuzasidan tegishli ko‘rsatmalar berdi.