Xalıq deputatları Bozataw rayonlıq Keńesi sekretariat baslıǵı A.Ibragimov hám 14-sanlı “Shaxaman” saylaw okruginen (ÓzXDP) saylanǵan deputat A.Ablakumov, rayondaǵı eń shetki aymaq esaplanǵan «Shaxaman» máhállesindegi shańaraqlık shıpakerlik punktinde boldı.
Shıpakerlik punkti jumısların úyreniw dawamında kóplegen nawqaslar kelip emlenip óz kesselliklerine shıpa alıp atırǵanı hámde biypul beriletuǵın dári-darmaqlar menen támiyinlengenligi anıqlandı.
Sonıń menen birge nawqaslar menen sáwbetleskende olar shıpakerlik punktindegi jaratılǵan imkaniyatlarǵa razı bolıp, bul jerdegi xanalardıń tazalıǵı hám shıpakerlerdiń xızmetleri ushın óz minnetdarshılıǵın bildirip alǵıslar aytpaqta.
Ushırasıw dawamında tarawda alıp barılıp atırǵan jumıslar, xalıqqa kórsetilip atırǵan medicinalıq xızmet sapası hámde bar mashqalalar, sonday-aq medicina mákemeleriniń materiallıq-texnikalıq bazasın bekkemlew, zamanagóy úskeneler menen támiyinlew hám maman kadrlar tayarlaw máseleleri keńnen dodalandı.
Nawqaslardı biypul beriletuǵın dári quralları menen támiyinlew jaǵdayı menen de jaqınnan tanıstı.
Medicina xızmetkerleri tárepinen bildirilgen pikir-usınıslar tıńlanıp, sistemanı jáne de jetilistiriw boyınsha pikir alısıldı.
Xalıqtıń salamatlıǵın qorǵaw - eń tiykarǵı wazıypalardan biri bolıp esaplanadı.