XOTIRA – ABADIY, INSON QADRI – MUQADDAS  

Xalq deputatlari Quva tuman Kengashi deputati, tuman hokimi X.Umarov hamda Kengash raisi Z.Ashurov boshchiligida tuman Kengashi deputatlari 9-may — “Xotira va qadrlash kuni” munosabati bilan tuman “Xotira maydoni”da tashkil etilgan maʼnaviy-maʼrifiy tadbirda faol ishtirok etdilar. 

  Tadbir davomida deputatlar tomonidan ikkinchi jahon urushi qatnashchilari, mehnat faxriylari va keksa avlod vakillariga alohida hurmat va ehtirom koʻrsatilib, Vatan ozodligi, yurt tinchligi va xalq farovonligi yoʻlida jonini fido qilgan ajdodlarimiz muqaddas xotirasi yod etildi. Shuningdek, nuroniylar holidan xabar olish, ularni eʼzozlash va inson qadrini ulugʻlash xalqimizga xos yuksak qadriyat ekani alohida taʼkidlandi. 

  Davlatimiz rahbarining Quva tumanini jadal rivojlantirish boʻyicha bergan topshiriqlari ijrosi doirasida zamonaviy qiyofa kasb etgan “Xotira maydoni”da oʻtkazilgan tadbirda tuman rahbarlari, viloyat va tuman Kengashi deputatlari, huquq-tartibot idoralari xodimlari, jamoatchilik vakillari, yoshlar hamda tuman faollari qatnashdilar. 

  Tadbirda deputatlar tomonidan keksa avlod vakillarining hayot yoʻli, mehnat faoliyati va Vatan oldidagi xizmatlarini munosib qadrlash, yosh avlodni vatanparvarlik va millatga sadoqat ruhida tarbiyalash masalalariga ham alohida eʼtibor qaratildi.