Xalq deputatlari Chilonzor tumani Kengashining 2026-yil 2-apreldagi III-19-22-14-204-K/26-son qarori asosida, Chilonzor tumani hokimligi huzuridagi "Fuqarolar tashabbusi jamg‘armasi" mablag‘lari hisobidan 2026-yilning 1-mavsumida g‘olib deb topilgan loyihalarni amalga oshirish ishlari izchil davom ettirilmoqda.

Mazkur qarorga muvofiq, Fidokor mahallasi hududida joylashgan Respublika OITSga qarshi kurashish markazi qoshidagi klinika binosida qurilish-ta'mirlash ishlari olib borilmoqda.

Loyiha doirasida bino pol qismi, shift qismi, ichki devorlar hamda eshik va derazalarini ta'mirlash ishlari bosqichma-bosqich amalga oshirilmoqda.
Ushbu loyiha uchun 1 milliard 500 million so‘m mablag‘ ajratilgan bo‘lib, qurilish-ta'mirlash ishlari Toshkent shahar hokimligi huzuridagi "Yagona buyurtmachi xizmati" injiniring kompaniyasi tomonidan belgilangan reja asosida bajarilmoqda.

Mazkur ishlar yakuniga yetkazilgach, markazda davolanayotgan bemorlar uchun yanada qulay va zamonaviy sharoitlar yaratilishi hamda tibbiy xizmat ko‘rsatish sifati yanada oshirilishi ko‘zda tutilgan.
Xalq deputatlari Chilonzor tumani Kengashi qarorlari ijrosi doimiy nazorat ostida.