Xotin-qizlarning tomorqadan samarali foydalanishi 5-Bog’cha saylov okrugi deputat M.Atoyeva e’tiborida bo’lib, ushbu yo’nalishda amalga oshirilayotgan ishlar joylarda tizimli ravishda o’rganilmoqda. Mirishkor mahallasining aholi xonadonlariga tashriflar davomida tomorqa yerlaridan unumli foydalanish, mavjud imkoniyatlarni to’liq ishga solish va qo’shimcha daromad manbaini yaratish masalalariga alohida urg’u berilmoqda.

Xususan, pomidor va kartoshka kabi asosiy sabzavot ekinlarini yetishtirish va parvarishlash jarayonlari ko’zdan kechirilib, agrotexnik talablarga amal qilish holati tahlil etildi. Ekinlarni o’z vaqtida ekish, sifatli urug’ tanlash, yerni tayyorlash, mineral va organik o’g’itlardan oqilona foydalanish, muntazam sug’orish ishlarini yo’lga qo’yish muhimligi ta’kidlandi. Shuningdek, kasallik va zararkunandalarga qarshi profilaktik chora-tadbirlarni o’z vaqtida amalga oshirish, hosildorlikni oshirishga qaratilgan zamonaviy usullardan foydalanish bo’yicha tushuntirishlar berildi.

O’rganishlar davomida ayrim xonadonlarda yuqori natijalarga erishilayotgani qayd etilib, ularning ilg’or tajribalarini ommalashtirish yuzasidan takliflar ilgari surildi. Shu bilan birga, tomorqadan foydalanishda yo’l qo’yilayotgan kamchiliklar ham ko’rsatib o’tildi va ularni bartaraf etish bo’yicha aniq tavsiyalar berildi.

Xotin-qizlarning tomorqachilik faoliyati orqali bandligini ta’minlash, ularning iqtisodiy faolligini oshirish, oilaviy byudjetga qo’shimcha daromad kiritish imkoniyatlarini kengaytirish masalalari ham muhokama qilindi. Bu borada ularga amaliy ko’mak ko’rsatish, zarur maslahatlar berish va qo’llab-quvvatlash choralari belgilab olindi.