Bugun, 6-avgust kuni Xalq deputatlari Karmana tumani Kengashining yettinchi chaqiriq yigirma sakkizinchi sessiyasi bo‘lib o‘tdi. Sessiyani tuman Kengashi raisi boshqarib bordi.
Sessiya kun tartibiga o'n to‘rtta dolzarb masala kiritilib, ularning barchasi deputatlar tomonidan atroflicha muhokama qilindi. Xususan, tuman hokimining aholi murojaatlari bilan ishlash holati, tumandagi kriminogen vaziyat hamda huquqbuzarliklarning oldini olish borasida 2026-yilning olti oyida amalga oshirilgan ishlar yuzasidan tuman prokurorining axboroti, tuman hokimligida ijro intizomini mustahkamlash, qonunchilik hujjatlari va topshiriqlari ijrosi ko'rib chiqildi. Shuningdek, adliya bo‘limining norma ijodkorligi hamda huquqni qo‘llash amaliyoti bo‘yicha axboroti, O‘zbekiston mahallasi Cho‘tqara massivining qayta tuzatish kiritilgan bosh reja va batafsil rejalashtirish loyihalarini tasdiqlash masalalari muhokama qilindi.
Bundan tashqari, sessiyada tumanda investitsiyalarni o‘zlashtirish, eksport va mahalliy sanoat bo‘yicha prognoz ko‘rsatkichlarining bajarilishi, mahalliy budjetning 2026-yil ikkinchi chorakdagi ijrosi hamda qo‘shimcha manbalar hisobidan mablag‘larni yo‘naltirish, "Kambag‘allikdan farovonlik sari" dasturini amalga oshirishga faol nuroniylarni jalb etish chora-tadbirlari atroflicha tahlil etildi. Nogironligi bo‘lgan shaxslarni ijtimoiy himoya qilish, ularning huquq va manfaatlarini ta’minlash borasidagi ishlar, shuningdek, suv tejovchi texnologiyalarni joriy etish va suv resurslaridan oqilona foydalanish holati yuzasidan mas'ullarning hisobotlari tinglandi.
Sessiya davomida muhokama qilingan barcha masalalar yuzasidan xalq deputatlari tuman Kengashining tegishli qarorlari qabul qilindi.