Xalq deputatlari Parkent tuman Kengashiga 4-«Bo‘ston» saylov okrugidan saylangan deputat Usipxodjayev Yerlan Ormanovich tomonidan o‘z saylov okrugidagi «Qirg‘izovul» mahalla fuqarolar yig‘ini profilaktika inspektori Maxmudov Ziyoddilla Zoxitjon o‘g‘li bilan uchrashuv o‘tkazildi.
🟢 Uchrashuvdan ko‘zlangan asosiy maqsad — Parkent tumani Ichki ishlar bo‘limi tomonidan 2026-yilning 9 oyi davomida jinoyatchilik va huquqbuzarliklarning oldini olish borasida amalga oshirilgan ishlarni o‘rganish, hududdagi kriminogen vaziyatni tahlil qilish hamda sessiya kun tartibidagi masala yuzasidan mavjud holatni atroflicha ko‘rib chiqishdan iborat bo‘ldi.
🟢 O‘rganish jarayonida «Qirg‘izovul» MFYdagi jinoyatchilik holati va profilaktik ishlarning samaradorligiga alohida e’tibor qaratildi. O‘rganish uchun taqdim etilgan ma’lumotlarga ko‘ra, 2026-yilning 9 oyi davomida mahallada oldini olish mumkin bo‘lgan 2 ta o‘g‘irlik jinoyati qayd etilgan. Shuningdek, hududda noqonuniy qurol saqlash bilan bog‘liq 1 ta jinoyat aniqlangan.
⚖️ Deputat tomonidan mahallada huquqbuzarliklarning barvaqt oldini olish, fuqarolarning mol-mulki daxlsizligini ta’minlash, aholi o‘rtasida huquqiy targ‘ibot va profilaktik tushuntirish ishlarini kuchaytirish hamda jinoyat sodir etilishiga sabab bo‘luvchi omillarni bartaraf etish masalalari yuzasidan fikr almashildi.
🟢 Shuningdek, profilaktika inspektorining mahallada jamoat tartibini saqlash, fuqarolar murojaatlari bilan ishlash, huquqbuzarlikka moyil shaxslar bilan manzilli profilaktik tadbirlarni tashkil etish borasidagi faoliyatini yanada takomillashtirish muhimligi ta’kidlandi.
📊 Sessiya oldi o‘rganishi davomida aniqlangan holatlar kelgusida jinoyatchilikning oldini olishga qaratilgan chora-tadbirlarni belgilash, mas’ul tashkilotlar hamkorligini kuchaytirish va mahallada osoyishta muhitni mustahkamlash nuqtayi nazaridan muhim ahamiyat kasb etadi.
🇺🇿 Xalq deputatlari Parkent tuman Kengashi deputatlari tomonidan sessiya kun tartibidagi masalalarni joyiga chiqqan holda o‘rganish, mavjud muammolarni aniqlash va ularning yechimi bo‘yicha takliflar ishlab chiqishga alohida e’tibor qaratilmoqda.