Xalq deputatlari Qo‘qon shahar Kengashi deputati Sh.Dehqonov tomonidan O‘zbekiston Respublikasining 1996-yil 29-avgustdagi O‘RQ-265-I-sonli "Fuqarolar sog‘lig‘ini saqlash to‘g‘risida"gi Qonuni ijrosi yuzasidan shahardagi 1-sonli oilaviy poliklinika faoliyati o‘rganildi.

O‘rganish davomida poliklinika bosh shifokori Z.Xasanjonova ishtirokida aholiga ko‘rsatilayotgan birlamchi tibbiy-sanitariya xizmatlari, yaratilgan sharoitlar hamda sog‘liqni saqlash tizimida amalga oshirilayotgan islohotlarning ijrosi atroflicha tahlil qilindi.

Xususan, davlat tomonidan ajratilayotgan 24 turdagi bepul dori-darmon vositalari bilan ta’minlanganlik holati, ularning poliklinikada mavjudligi hamda fuqarolarga o‘z vaqtida yetkazib berilishi o‘rganildi.

Shuningdek, ijtimoiy himoyaga muhtoj fuqarolar, surunkali kasalliklarga chalingan bemorlar va dispanser nazoratida turgan shaxslarning bepul dori vositalari bilan manzilli ta’minlanishi hamda bu boradagi amaliy ishlar ko‘rib chiqildi.

O‘rganish davomida deputat mas’ul tibbiyot xodimlari va shifokorlar bilan voyaga yetmaganlar o‘rtasida erta tug‘ruqning oldini olish, reproduktiv salomatlikni mustahkamlash hamda profilaktik targ‘ibot ishlarini kuchaytirish masalalari yuzasidan muloqot o‘tkazdi.

Muloqotda, shuningdek, aholining tibbiy madaniyatini yuksaltirish, "mahallabay" ishlash tizimi asosida har bir bemorga individual yondashuvni ta’minlash, profilaktik ko‘riklarni samarali tashkil etish hamda birlamchi tibbiy xizmatlar sifatini yanada oshirish masalalariga alohida e’tibor qaratildi.

Xalq deputatlari Qo‘qon shahar Kengashi