Xalq deputatlari Bo‘stonliq tumani Kengashining 2026-yilga mo‘ljallangan Ish rejasiga muvofiq Kengash raisi O.Babayev va kotibiyati mudiri J.Sadirov tomonidan “Xondoyliq” oilaviy shifokorlik punktida tibbiy xizmat sifati va yaratilgan sharoitlar o‘rganildi.

Ushbu muassasa O‘zbekiston Xalq demokratik partiyasining deputatlik guruhi tomonidan o‘rganilib, mukammal ta’mirlash ishlariga Kengashning tegishli qaroriga asosan tuman budjetining qo‘shimcha manbalari hisobidan mablag‘lar ajratilgan edi.

Bugungi o‘rganish davomida binoning ichki va tashqi qismida bajarilgan ta’mirlash ishlari, qabul xonalari, muolaja va emlash xonalari, laboratoriya, tibbiy jihozlar bilan ta’minlanganlik darajasi, sanitariya-gigiyena talablariga rioya etilishi hamda bemorlar uchun yaratilgan qulayliklar ko‘zdan kechirildi.

Muassasada shifokor va hamshiralari muassasaning mukammal ta’mirlash ishlari natijasida tibbiyot muassasasining qiyofasi tubdan yangilangani, bemorlar va tibbiyot xodimlari uchun zamonaviy hamda qulay muhit yaratilganini alohida ta’kidladilar. Shu bilan birga, yaratilgan mehnat sharoitlari, zamonaviy tibbiy uskunalardan samarali foydalanish, dori-darmon ta’minoti, elektron tibbiy xizmatlar hamda aholiga tezkor va sifatli xizmat ko‘rsatish tizimi yuzasidan mas’ullarning axboroti tinglandi.