️Oʻzbekiston Respublikasi Oliy Majlis Qonunchilik palatasi deputatlari I. Tokareva, Z. Shodiyeva, J. Achilov hamda xalq deputatlari Chilonzor tuman Kengashi deputati D. Mahmudova ishtirokida partiyaning faol xotin-qizlari bilan ochiq muloqot shaklida uchrashuv tashkil etildi.

️Uchrashuv davomida deputatlar tomonidan soʻnggi yillarda qonunchilikka kiritilgan yangiliklar, xotin-qizlarning huquq va manfaatlarini himoya qilishga qaratilgan normativ-huquqiy hujjatlar, shuningdek, gender tenglikni taʼminlash borasida amalga oshirilayotgan islohotlar haqida batafsil maʼlumot berildi.

Shuningdek, Chilonzor tuman Kengashi deputati D. Mahmudova ham soʻzga chiqib, xotin-qizlarning jamiyatdagi oʻrni va faolligini oshirish, ularni har tomonlama qoʻllab-quvvatlash hamda joylarda mavjud muammolarni tizimli hal etish yuzasidan oʻz fikr-mulohazalarini bildirdi.

️Muloqot jarayonida faol xotin-qizlar oʻzlarini qiziqtirgan savollar bilan murojaat qildilar. Xususan, tazyiq va zoʻravonlik holatlarining oldini olish, jabrlangan ayollarni himoya qilish, ularga huquqiy, psixologik hamda ijtimoiy yordam koʻrsatish masalalari atroflicha muhokama qilindi.

️Deputatlar tomonidan tazyiqqa uchragan ayollar bilan ishlash tizimi, himoya orderini rasmiylashtirish tartibi, reabilitatsiya jarayonlari hamda ularni jamiyatga moslashtirish boʻyicha amalga oshirilayotgan chora-tadbirlar yuzasidan batafsil tushuntirishlar berildi. Shuningdek, bunday holatlarning barvaqt oldini olishda mahalla institutlari, jamoatchilik va davlat organlarining oʻzaro hamkorligi muhim ahamiyat kasb etishi taʼkidlandi.

️Uchrashuv yakunida xotin-qizlarning huquqiy ongi va ijtimoiy faolligini yanada oshirish, ularni har tomonlama qoʻllab-quvvatlash davlat siyosatining ustuvor yoʻnalishlaridan biri boʻlib qolishi alohida qayd etildi.