Ogoh bo‘ling, firibgar!

Bugungi kunda kiberjinoyat va firibgarlik holatlari tobora ko‘payib borayotgani jamiyatimizdan yanada yuqori ogohlik va huquqiy madaniyatni talab etmoqda.

Shu maqsadda O‘zbekiston “Adolat” sotsial-demokratik partiyasi tomonidan amalga oshirilayotgan “Ogoh bo‘ling, firibgar!” aksiyasi doirasida Namangan davlat universiteti tibbiyot fakulteti majlislar xonasida keng qamrovli targ‘ibot tadbiri tashkil etildi.

Tadbirni “Adolat” SDP Namangan viloyat Kengashi raisi Isroiljon Jo‘rayev qisqacha kirish so‘zi bilan ochib berdi. Dastlab O‘zbekiston Respublikasi Adliya vazirligi tomonidan tayyorlangan, firibgarlik holatlari va ularning achinarli oqibatlari aks etgan videorolik namoyish etildi. Mazkur rolik ishtirokchilarda katta taassurot qoldirdi.

Shundan so‘ng so‘zga chiqqan — viloyat Ichki ishlar boshqarmasining kiberxavfsizlik bo‘yicha mas’ul xodimi Umidjon Mamarahimov, shahar adliya bo‘limi bosh maslahatchisi Ahrorbek Tillayev, NamDU professori, shahar Kengashi deputati Narimon Dehqonov, Respublika Ma’naviyat va ma’rifat markazi viloyat bo‘limi rahbari, viloyat Kengashi deputati Musoxon Oppoqov hamda viloyat IIB kiberxavfsizlik bo‘limi mas’ul xodimi Otabek Jalolov — kiberjinoyat va firibgarlikning zamonaviy ko‘rinishlari, ularning kelib chiqish sabablari, huquqiy oqibatlari va eng muhimi, ulardan himoyalanish usullari haqida atroflicha ma’lumot berdilar.

Mutaxassislar tomonidan internet tarmoqlari orqali amalga oshirilayotgan aldov sxemalari, shaxsiy ma’lumotlarni himoya qilish qoidalari, shubhali havolalar va qo‘ng‘iroqlarga nisbatan ehtiyotkor bo‘lish zarurati alohida ta’kidlandi.

Tadbir davomida talabalar o‘zlarini qiziqtirgan savollar bilan faol ishtirok etib, mutaxassislardan batafsil javob oldilar. Bu kabi ochiq muloqotlar yoshlarning huquqiy ongini oshirish, kiberxavfsizlik madaniyatini shakllantirish va firibgarlikning oldini olishda muhim ahamiyat kasb etadi.