▶️“O‘zbekiston – 2030” strategiyasi: milliy taraqqiyotning yangi bosqichi jamoatchilik muhokamasida

Konimex tumani hokimligi majlislar zalida “O‘zbekiston – 2030” strategiyasini takomillashtirishning mazmun-mohiyati va uning amaliy ahamiyati” mavzusida seminar bo‘lib o‘tdi.

✔️Mazkur tadbir mamlakatimiz taraqqiyotining kelgusi besh yillik istiqbollarini belgilab beruvchi muhim strategik hujjat yuzasidan jamoatchilik fikrini shakllantirishga qaratildi.

➡️Seminar davomida ma’ruzachilar O‘zbekiston Respublikasi Prezidenti Shavkat Mirziyoyevning 2025-yil 26-dekabr kuni Oliy Majlis va O‘zbekiston xalqiga yo‘llagan Murojaatnomasida so‘nggi yillarda amalga oshirilgan keng ko‘lamli islohotlar natijasida erishilgan yutuqlarni atroflicha tahlil qildilar. Barqaror iqtisodiy o‘sish, aholi turmush darajasining izchil oshib borayotgani, ijtimoiy sohada qo‘lga kiritilgan muhim natijalar olib borilayotgan islohotlarning amaliy samarasi ekani ta’kidlandi.

✔️Shuningdek, zamon talablari, global jarayonlar va jamiyat ehtiyojlaridan kelib chiqib, “O‘zbekiston – 2030” strategiyasini qayta ko‘rib chiqish va takomillashtirish zarurati alohida e’tirof etildi. Prezident Murojaatnomasida ushbu strategiya mamlakatning kelgusi taraqqiyot yo‘lini belgilovchi muhim hujjat ekani, uni ishlab chiqish va takomillashtirish jarayoni esa keng jamoatchilik muhokamasi asosida, aholi fikr-mulohazalari va tashabbuslarini inobatga olgan holda amalga oshirilishi lozimligi qayd etilgani ta’kidlandi.

Seminar doirasida “O‘zbekiston – 2030” strategiyasining takomillashtirilgan loyihasini jamoatchilik muhokamasiga qo‘yish jarayonining ahamiyati ham atroflicha yoritildi. Ushbu jarayon fuqarolar, mahalla yettiligi vakillari, nodavlat notijorat tashkilotlari, soha mutaxassislari hamda ekspertlarning faol ishtirokini ta’minlashga qaratilgani qayd etildi.

📢 Ma’ruzachilar tomonidan Murojaatnomada belgilangan ustuvor vazifalar asosida ishlab chiqilgan strategiyaning asosiy maqsad va vazifalari muhokama qilindi. Jumladan, aholi farovonligini oshirish, iqtisodiyotni jadal rivojlantirish, ijtimoiy soha, ta’lim va sog‘liqni saqlash tizimini takomillashtirish, ekologik barqarorlikni ta’minlash hamda hududlarni kompleks rivojlantirish masalalariga alohida e’tibor qaratildi.

Tadbir yakunida ishtirokchilar tomonidan bildirilgan fikr va takliflar “O‘zbekiston – 2030” strategiyasining takomillashtirilgan loyihasini yanada mukammallashtirish, uni aholi manfaatlariga yanada yaqinlashtirishda muhim ahamiyat kasb etishi ta’kidlandi. Bunday ochiq muloqotlar milliy taraqqiyot g‘oyasining amaliy ifodasi bo‘lgan mazkur strategiyani hayotga tatbiq etishda mustahkam poydevor bo‘lib xizmat qiladi.