Chirchiq shahar Kengashining Agrar, suv xo‘jaligi va ekologiya masalalari bo‘yicha doimiy
komissiyasi raisi, deputat Alisher Abdullayev va uning o‘rinbosari deputat
Zokir Xalmuxamedov Quyosh MFYda aholi bilan uchrashuv o‘tkazdilar. 

Uchrashuv Chirchiq shahar hokimining murojaatlar telegram kanaliga kelib tushgan
murojaatlar asosida tashkil etildi. Fuqarolar MCHJ BSK "Jewellery
Stroy" boshqaruv servis kompaniyasining qoniqarsiz faoliyati, BSK
xodimlarining o‘z majburiyatlarini bajarmayotganligi bo‘yicha murojaat
qilishgan. 

Uchrashuv davomida deputatlar uy-joy egalarining shikoyat va e’tirozlarini tingladilar.
Fuqarolar tomonidan MCHJ "Jewellery Stroy" BSK faoliyatidan
qoniqmaganliklari sababli, ushbu BSK bilan shartnomani bekor qilish va boshqa
BSKni tanlash masalasi ko‘tarildi. 

Muhokamalardan so‘ng, yaqin kunlar ichida Quyosh MFYdagi ko‘p qavatli uylar mulkdorlarining
umumiy yig‘ilishini o‘tkazish va yangi BSK tanlab, u bilan shartnoma tuzish
bo‘yicha qarorga kelindi. 

Shuningdek, deputatlar mahalla faollari bilan birgalikda Quyosh MFY hududini aylanib
chiqdilar. Asosiy e’tibor sug‘orish tizimlarini yaxshilash va modernizatsiya
qilish, yashil maydonlarni ko‘paytirish, ko‘p qavatli uylar atrofida mevali
daraxtlar, uzumzorlar va butalar ekish masalalariga qaratildi. Mazkur masalalarni
hal etish maqsadida kelgusida ham birgalikda maslahatlashuvlar va uchrashuvlar
o‘tkazib borish kelishib olindi.