Har bir xalqning yuragida unga kuch, birlik va g‘urur bag‘ishlaydigan ramzlar bo‘ladi. O‘zbekistonimizning ham shunday ulug‘ va qadrli timsollaridan biri — Davlat bayrog‘i. Yurtimizda 18-noyabr kuni bu muqaddas ramz qabul qilingan kun sifatida e’zozlanadi. Bayroq — bu shunchaki mato emas; u xalqning tarixi, ruhiyati va mustaqillik ruhi mujassam topgan osmono‘par belgidir.

Tarixning muhim lahzasi

1991-yil 18-noyabr kuni O‘zbekiston o‘z davlat mustaqilligini mustahkamlovchi yana bir ulkan qadamni qo‘ydi. Oliy Kengash tomonidan yangi milliy bayroq tasdiqlandi va u mustaqil O‘zbekistonning butun dunyoga yuz tutgan ilk ramzlaridan biriga aylandi. Shu kundan boshlab bayrog‘imiz xalqaro maydonlarda hilpirab, o‘zbek nomining dovrug‘ini taratib kelmoqda.

Bu sana – nafaqat siyosiy qaror qabul qilingan kun, balki ming yillar davomida shakllanib kelgan xalq ruhining ranglar orqali mujassam bo‘lib, butun jahon maydoniga kirib kelgan buyuk daqiqadir. 

18-noyabr O‘zbekistonda nafaqat rasmiy bayram, balki xalqni birlashtiruvchi ma’naviy sana sifatida nishonlanadi. Maktablarda, oliygohlarda, muassasalar va mahallalarda bayroqning qadr-qimmati haqida ma’rifiy tadbirlar o‘tkaziladi. 

Davlat bayrog‘i — xalqning eng muqaddas timsollaridan biri. 18-noyabr sanasi esa bizni tarixga qaytaradi, mustaqillikning ilk izlarini yodga soladi, bir vaqtning o‘zida kelajak sari ishonch bilan qadam tashlashga undaydi. Bayrog‘imizni asrab-avaylash, uni ulug‘lash — Vatanga bo‘lgan sadoqatning eng yorqin ko‘rinishidir.

Xalq deputatlari Urganch shahar Kengashi deputati B.Djumaniyazov