Jo‘yjangal mahallasida o‘rganish va ochiq muloqot o‘tkazildi

Oliy Majlis Qonunchilik palatasi deputati R. Astanaqulova hamda Xalq deputatlari Termiz tuman Kengashi deputati R. Shamanov tomonidan Jo‘yjangal mahallasida mahalla yettiligi, hokim yordamchisi, bank xodimi va mahalla raisi ishtirokida hududdagi ijtimoiy-iqtisodiy holat joyiga chiqqan holda o‘rganildi.

Ma’lum qilinishicha, Jo‘yjangal mahallasida 3 110 nafar aholi va 632 ta xonadon istiqomat qiladi. Joriy yilning o‘tgan davrida oilaviy tadbirkorlikni rivojlantirish maqsadida hokim yordamchisi tomonidan 35 nafar fuqaroga 728 million so‘m, mahalla bankiri tomonidan esa 20 nafar fuqaroga 420 million so‘m miqdorida kredit mablag‘lari ajratilgan. Mazkur kreditlar asosan xizmat ko‘rsatish, issiqxona tashkil etish va parrandachilik yo‘nalishlarida yangi loyihalarni amalga oshirishga yo‘naltirilgan.

Shuningdek, deputatlar mahalla yettiligi bilan birgalikda Jo‘yjangal mahallasidagi 15-sonli umumta’lim maktabida olib borilayotgan joriy ta’mirlash ishlari bilan tanishdi. Qurilish-ta’mirlash ishlarining sifati, bajarilish sur’ati hamda belgilangan muddatlarda yakunlanishi yuzasidan mas’ullarga tegishli tavsiya va ko‘rsatmalar berildi.

Uchrashuv yakunida fuqarolar bilan ochiq muloqot o‘tkazilib, ularning murojaat va takliflari tinglandi. Bildirilgan masalalarni o‘rganish hamda amaliy yechim topish bo‘yicha tegishli vazifalar belgilandi.

Bunday uchrashuvlar hududlarda olib borilayotgan islohotlar samaradorligini oshirish, aholi bilan bevosita muloqotni kuchaytirish hamda mavjud muammolarni joyida hal etishga xizmat qilmoqda.