Fuqarolar murojaatlari – deputat e’tiborida

Xalq deputatlari Termiz tuman Kengashi deputati A.Avliyakulov M.Eshtemirov mahallasi vakillari bilan ochiq muloqot o‘tkazdi.

Suhbatning asosiy maqsadi fuqarolar murojaatlariga yanada yaqin bo‘lish, ularning muammo va takliflarini o‘z vaqtida o‘rganish hamda amaliy yechim topish masalalariga qaratildi. Muloqot davomida aholini qiynayotgan masalalar tinglanib, ularni hal etish bo‘yicha fikr almashildi.

Shuningdek, deputat tomonidan fuqarolar murojaatlarini qabul qilish uchun maxsus murojaatlar daftari mahallada doimiy ravishda saqlanishi ma’lum qilindi. Endilikda fuqarolar o‘zlarini qiziqtirayotgan masala, taklif va murojaatlarini ushbu daftarga yozib qoldirishlari mumkin.

Ta’kidlanganidek, daftarga kelib tushgan murojaatlar har hafta deputat tomonidan o‘rganilib, ular yuzasidan tegishli tashkilotlar bilan hamkorlikda amaliy ishlar olib boriladi.

Zarur hollarda murojaatlar joyiga chiqqan holda o‘rganilib, fuqarolar bilan bevosita muloqot asosida yechim topishga alohida e’tibor qaratiladi.

Deputat va xalq o‘rtasidagi doimiy muloqot — muammolarni o‘z vaqtida aniqlash va hal etishning muhim omilidir.