Xalq deputatlari Qo‘qon shahar Kengashining “Mahalliy budjet, tadbirkorlikni rivojlantirish va iqtisodiy islohotlar masalalari bo‘yicha” doimiy komissiyasining navbatdagi yig‘ilishi bo‘lib o‘tdi.

Yig‘ilishda kun tartibidan o‘rin olgan muhim masala — O‘zbekiston Respublikasi Prezidentining 2025-yil 30-yanvardagi PF-17-sonli farmoyishi ijrosi doirasida tashkil etilgan “Infratuzilma va ijtimoiy barqarorlik” jamg‘armasi mablag‘lari hisobidan mablag‘ ajratish masalasini ko‘rib chiqish bo‘ldi.

Muhokamalar davomida shahar aholisining ijtimoiy himoyasini kuchaytirish, tibbiy xizmatlar sifatini yaxshilash hamda infratuzilma obyektlarini rivojlantirishga qaratilgan takliflar atroflicha tahlil qilindi.

Xususan, Qo‘qon shahar aholisini sog‘lig‘ini tiklash va davolanishlari uchun qulay shart-sharoit yaratish maqsadida shahar 1-sonli shifoxona binosini ta’mirlash bilan bog‘liq xarajatlarni moliyalashtirish masalasi ko‘rib chiqildi.

Shuningdek, shahadagi asosiy ko‘chalardagi avtomobil yo‘llarini ajratib turuvchi beton to‘siq ustiga piyodalar xavfsizligini ta’minlash, baxtsiz xodisa kelib chiqishini oldini olish maqsadida temir panjara to‘siq o‘rnatish bilan bog‘liq bo‘lgan zarur infratuzilma loyihalarini moliyalashtirish yuzasidan ham takliflar muhokama etildi.

Komissiya a’zolari tomonidan mablag‘larni maqsadli va samarali sarflash, amalga oshiriladigan ishlar ustidan doimiy monitoring o‘rnatish hamda ajratilgan mablag‘larning natijadorligini ta’minlash bo‘yicha tegishli tavsiyalar bildirildi.

Yig‘ilish yakunlariga ko‘ra kun tartibidagi masala yuzasidan tegishli qaror qabul qilinib, uning ijrosini nazorat qilish bo‘yicha mas’ullar belgilandi.

Xalq deputatlari Qo‘qon shahar Kengashi