Uchtepa tumanida mahallabay ishlash tizimi - amaliy o‘rganish va muammolar yechimiga e’tibor

 🇺🇿 Xalq deputatlari Uchtepa tuman Kengashining "19-Farhod" saylov okrugi deputati Tuxtasinov Ilhomjon Madaminovich tomonidan okrug hududidagi “Guzar” MFYda mahalla yettiligi faoliyati hamda fuqarolarning murojaatlari o‘rganildi. Mazkur o‘rganish jarayonida aholi bilan ochiq muloqot o‘rnatilib, mavjud muammolarni aniqlash va ularni bartaraf etish choralariga alohida e’tibor qaratildi. O‘rganish davomida O‘zbekiston Respublikasi Prezidenti tomonidan 2026-yil 5-yanvarda qabul qilingan PQ-1-sonli qaror ijrosi yuzasidan olib borilayotgan ishlar bilan yaqindan tanishildi. Xususan, mazkur qarorga muvofiq mahallalarda xavfsiz muhitni yaratish, fuqarolar muhofazasini kuchaytirish hamda profilaktika tizimini takomillashtirishga qaratilgan manzilli ishlar amalga oshirilayotgani kuzatildi.

 🇺🇿 Jarayonda O‘zbekiston Respublikasi Favqulodda vaziyatlar vaziri Aziz Ikramov tashabbusi bilan mahallaga biriktirilgan profilaktika inspektori hamda favqulodda vaziyatlar xodimi ishtirokida fuqarolar bilan tushuntirish ishlari olib borilayotgani e’tiborga molik bo‘ldi. Ushbu suhbatlarda tuman deputatlari ham faol ishtirok etib, qaror ijrosi hamda fuqarolar xavfsizligini ta’minlash borasidagi ishlar bilan tanishdilar.

 📝 Shuningdek, deputat tomonidan murojaat qilgan fuqaroning masalasi joyiga chiqib o‘rganildi va unga huquqiy tushuntirishlar berildi. Mazkur murojaat doimiy nazoratga olinib, ayniqsa tibbiy masala yuzasidan aniqlik kiritilishi va amaliy yordam ko‘rsatilishi ta’kidlandi.

Mahalla yettiligi tomonidan amalga oshirilayotgan ishlar ham atroflicha muhokama qilinib, hududni ijtimoiy-iqtisodiy rivojlantirish, aholi farovonligini oshirish hamda muammolarni tizimli hal etish borasidagi yondashuvlar ko‘rib chiqildi.

 📁 Mazkur o‘rganish jarayonida xalq deputatlari Uchtepa tumani Kengashi kotibiyati mudiri Usmanov Anvar Baxramovich ham ishtirok etdi. Umuman olganda, ushbu o‘rganish mahallabay ishlash tizimining samaradorligini oshirish, fuqarolar murojaatlariga tezkor va manzilli yechim topish, shuningdek, hududlarda xavfsiz muhitni ta’minlash borasidagi ishlarni yanada kuchaytirishga xizmat qiladi.