Бугунги кунда Ўзбекистон Республикаси ва Америка Қўшма Штатлари ўртасидаги муносабатлар янги, стратегик босқичга кўтарилаётгани мамлакатимиз ташқи сиёсатининг изчиллиги ва очиқликка асосланган йўналишини яққол намоён этмоқда. Президент Шавкат Мирзиёев раҳбарлигида амалга оширилаётган ислоҳотлар ва “инсон қадри учун” тамойилига асосланган давлат сиёсати халқаро ҳамжамият, жумладан АҚШ томонидан ҳам юқори баҳоланмоқда.

Ўзбекистон ва Америка ўртасидаги стратегик мулоқот нафақат сиёсий ва иқтисодий соҳаларда, балки таълим, экология, инновация, инсон ҳуқуқлари ва хавфсизлик соҳаларида ҳам самарали натижалар бермоқда. Хусусан, C5+1 формати доирасидаги ҳамкорлик минтақавий барқарорлик ва ўзаро ишончни мустаҳкамлашда муҳим аҳамият касб этмоқда.

Иқтисодий соҳада Америка компаниялари ва инвестиция фондларининг Ўзбекистон бозорига қизиқиши ортиб бораётгани мамлакатимиздаги бизнес муҳитининг шаффоф ва прогноз қилинадиган бўлиб бораётганидан далолатдир. Шу билан бирга, янги технологиялар, энергия самарадорлиги ва рақамли иқтисодиёт соҳасида АҚШ билан қўшма лойиҳаларни амалга ошириш мамлакатимиз иқтисодий ўсишига янги туртки бериши шубҳасиз.

Парламентлараро ҳамкорлик ва фуқаролик жамияти институтлари ўртасидаги мулоқот ҳам икки давлат ўртасидаги муносабатларнинг муҳим таркибий қисми ҳисобланади. Бу йўналишдаги амалий қадамлар халқларимизнинг ўзаро англашувини чуқурлаштириб, барқарор ва узоқ муддатли шерикликни таъминлайди.

Шу маънода, Ўзбекистон – Америка муносабатларининг янги босқичи мамлакатимиз тараққиёти, минтақавий тинчлик ва жаҳон миқёсида барқарор ривожланиш йўлидаги муҳим омил сифатида намоён бўлмоқда.

У.Урынбаева

Халқ депутатлари Мўйноқ туман кенгаши депутати