Xalq deputatlari Qo‘qon shahar Kengashi deputati, Kengash raisi O‘.Tojiyeva tomonidan “Chodaklik” mahalla fuqarolar yig‘inida yoshlar yetakchisi Sh.Raimovaning O‘zbekiston Respublikasining 2016-yil 14-sentabrdagi O‘RQ-406-sonli “Yoshlarga oid davlat siyosati to‘g‘risida”gi Qonuni ijrosi yuzasidan olib borayotgan ishlari o‘rganildi.

O‘rganish davomida yoshlar yetakchisi tomonidan Qonun ijrosini ta’minlash borasida amalga oshirilgan ishlar yuzasidan batafsil ma’lumot berildi. Jumladan, og‘ir toifadagi 52 nafar yosh bepul kasb-hunarga o‘qitish kurslariga jalb etilgani, 68 nafar yoshning bandligi ta’minlanib ishga joylashtirilgani, 41 nafar yosh doimiy ish o‘rni bilan ta’minlangani, 12 nafar yoshga imtiyozli kredit olishda, 7 nafar yoshga subsidiya ajratilishida amaliy yordam ko‘rsatilgani qayd etildi.

Shuningdek, mahalla yoshlarining sport sohasidagi yutuqlari ham e’tirof etilib, 86 nafar yosh turli sport musobaqalarida 1 va 2-o‘rinlarni qo‘lga kiritgani ma’lum qilindi. Bu natijalar yoshlarning bo‘sh vaqtini mazmunli tashkil etish, sog‘lom turmush tarzini keng targ‘ib qilish hamda sportga bo‘lgan qiziqishini oshirish borasida olib borilayotgan ishlarning samarasi sifatida baholandi.

O‘rganish jarayonida yoshlarga yaratilayotgan imkoniyatlardan samarali foydalanish, kasb-hunarga o‘qitish, bandlikni ta’minlash, imtiyozli kredit va subsidiyalar ajratish tartibi, fuqarolar murojaatlarini ko‘rib chiqish mexanizmlari hamda ehtiyojmand yoshlarga ko‘rsatilayotgan xizmatlar samaradorligini yanada oshirish masalalari yuzasidan mas’ullar bilan atroflicha fikr almashildi.

Xalq deputatlari Qo‘qon shahar Kengashi