Xalq deputatlari Jondor tumani Kengashiga 3-Romish saylov okrugidan saylangan deputat R.Bozorova hamda tuman Kengashi kotibiyati bosh mutaxassisi R.Murojov hamkorligida “Oqtepa” mahallasida saylovchilar bilan ochiq muloqot tashkil etildi.
Uchrashuv davomida fuqarolarning ijtimoiy-iqtisodiy hayotiga daxldor masalalar, mahalla infratuzilmasini yaxshilash, kommunal xizmatlar sifatini oshirish, aholi bandligini ta’minlash hamda ijtimoiy himoyaga muhtoj oilalarni qo‘llab-quvvatlash bilan bog‘liq murojaatlar tinglandi. 

Deputat R.Bozorova saylovchilar tomonidan bildirilgan har bir taklif va muammoni atroflicha o‘rganish, ularni amaldagi qonunchilik doirasida hal etish yuzasidan tegishli choralar ko‘rilishini ta’kidladi. Shuningdek, ayrim masalalarni hal etish bo‘yicha mutasaddi tashkilotlarga deputatlik nazorati va deputat so‘rovi orqali amaliy choralar ko‘rilishi ma’lum qilindi.
Uchrashuv ochiq muloqot va savol-javoblar ruhida o‘tdi. Saylovchilar o‘zlarini qiziqtirgan masalalar yuzasidan huquqiy tushuntirishlar oldilar hamda bildirilgan takliflar kelgusidagi deputatlik faoliyatida ustuvor vazifalardan biri sifatida nazoratga olinishi qayd etildi.
Bunday uchrashuvlar aholi bilan doimiy muloqotni mustahkamlash, hududlardagi mavjud muammolarni o‘z vaqtida aniqlash va ularga yechim topishda muhim ahamiyat kasb etadi.