Xalq deputatlari Jondor tumani Kengashi deputati I.Xolov tomonidan saylovchilar bilan o‘tkazilgan uchrashuvlar davomida davlat ahamiyatidagi avtomobil yo‘lining ayrim qismlari ta’mirtalab holatga kelib qolganligi yuzasidan murojaatlar kelib tushgan edi.
📌Mazkur muammoni bartaraf etish hamda aholi uchun qulay va xavfsiz harakatlanish sharoitlarini yaratish maqsadida deputat tomonidan tuman yo‘llardan foydalanish davlat muassasasi direktori M.Hamroyev nomiga deputat so‘rovi yuborildi.
📌Deputat so‘rovida yo‘lning texnik holatini o‘rganish, mavjud kamchiliklarni bartaraf etish hamda ta’mirlash ishlarini amalga oshirish yuzasidan aniq taklif va talablar bildirildi. Murojaat tegishli tartibda ko‘rib chiqilib, qisqa muddat ichida amaliy ishlar boshlandi.
📌Natijada deputat nazoratiga olingan mazkur avtomobil yo‘lida bir oy davomida keng ko‘lamli kapital ta’mirlash ishlari amalga oshirildi. Ta’mirlash jarayonida yo‘l qoplamasi to‘liq yangilanib, harakat xavfsizligini ta’minlashga qaratilgan zarur ishlar bajarildi.
📌Bugungi kunda ta’mirlangan yo‘l foydalanishga topshirilib, aholi va haydovchilar uchun yanada qulay shart-sharoitlar yaratildi. Eng muhimi, saylovchilar tomonidan ko‘tarilgan muammoning ijobiy hal etilgani deputatlik faoliyatining samarali natijasi bo‘ldi.
📌Deputat I.Xolov bundan buyon ham aholi murojaatlari va hududdagi dolzarb masalalar yechimi yuzasidan tegishli tashkilotlar bilan hamkorlikda ish olib borishini ta’kidladi. Mazkur holat deputat so‘rovi orqali aholi manfaatlarini ta’minlashning amaliy namunasi sifatida e’tirof etilmoqda.