Xalq deputatlari Qo‘qon shahar Kengashining “Reglament va deputatlik odob-axloqiy masalalari” bo‘yicha doimiy komissiyasi yig‘ilishi o‘tkazildi.

Yig‘ilishda Kengash deputatlarining 2026-yilning o‘tgan davri, xususan may oyidagi faoliyati tahlil qilinib, sessiyalardagi ishtiroki, deputatlik so‘rovlari yuborish amaliyoti, saylov okruglarida fuqarolar bilan uchrashuvlar tashkil etilishi hamda murojaatlar bilan ishlash holati muhokama qilindi.

Ta’kidlanishicha, 2026-yilning o‘tgan davrida o‘tkazilgan 7 ta sessiyada deputatlarning ishtiroki yuzasidan monitoring olib borilgan. Tahlillar natijasida ayrim deputatlar sessiyalarda muntazam faol qatnashgan bo‘lsa, ayrim deputatlar tomonidan sessiya yig‘ilishlarida ishtirok etish holatlari yetarli darajada ta’minlanmagani qayd etildi.

Shuningdek, komissiya tomonidan deputatlarning may oyidagi amaliy faoliyati ham o‘rganildi. Natijalarga ko‘ra, bir qator deputatlar tomonidan fuqarolar muammolarini hal etish maqsadida deputatlik so‘rovlari yuborilgan bo‘lib, may oyi davomida tegishli tashkilotlarga jami 10 ta deputatlik so‘rovi chiqarilgani ma’lum qilindi.

Yig‘ilish davomida deputatlarning saylov okruglaridagi faoliyati ham tanqidiy-tahliliy ruhda ko‘rib chiqildi. Xususan, har bir deputat tomonidan tasdiqlangan reja-grafik asosida fuqarolar bilan uchrashuvlar o‘tkazilishi belgilangan bo‘lishiga qaramay, ayrim hollarda ushbu rejalarning ijrosi to‘liq ta’minlanmayotgani qayd etildi.

Komissiya a’zolari tomonidan deputatlik faoliyati samaradorligini yanada oshirish, sessiyalardagi ishtirokni kuchaytirish, saylovchilar bilan muntazam muloqotni yo‘lga qo‘yish hamda fuqarolar murojaatlarini o‘z vaqtida hal etish yuzasidan tegishli tavsiya va takliflar bildirildi.

Yig‘ilish yakunida deputatlar faoliyati ustidan jamoatchilik va deputatlik nazoratini kuchaytirish, tasdiqlangan reja-grafiklar ijrosini ta’minlash hamda deputatlik faoliyati samaradorligini oshirish bo‘yicha tegishli vazifalar belgilab olindi.

Xalq deputatlari Qo‘qon shahar Kengashi