Xalq deputatlari Uchquduq tuman Kengashining 16-“Paxtakor” saylov okrugidan saylangan deputat A.Xayrullayev tomonidan Navoiy mahalla fuqarolar yig‘inida saylovchilar bilan navbatdagi uchrashuv tashkil etildi.

Uchrashuv davomida mahalla aholisini qiynab kelayotgan dolzarb masalalar, hududni ijtimoiy-iqtisodiy rivojlantirish, infratuzilmani yaxshilash hamda aholi farovonligini oshirishga qaratilgan taklif va tashabbuslar muhokama qilindi.
Fuqarolar tomonidan ichimlik suvi ta’minoti, yo‘llarni ta’mirlash, ko‘cha yoritgichlari, obodonlashtirish ishlari, yoshlar bandligini ta’minlash hamda ijtimoiy himoyaga muhtoj oilalarni qo‘llab-quvvatlash masalalari yuzasidan murojaatlar va takliflar bildirildi.

Deputat A.Xayrullayev har bir murojaatni atroflicha o‘rganib chiqish, mutasaddi tashkilotlar bilan hamkorlikda amaliy choralar ko‘rish va ko‘tarilgan masalalarning ijrosini nazoratga olish bo‘yicha tegishli vazifalarni belgilab berdi.
Bunday ochiq muloqotlar aholi muammolarini joyida o‘rganish, fuqarolarning taklif va tashabbuslarini qo‘llab-quvvatlash hamda deputatlik faoliyatining samaradorligini oshirishda muhim ahamiyat kasb etadi.