MAHALLA TIZIMI FAOLIYATI DEPUTATLIK NAZORATI TARTIBIDA O‘RGANILDI
✅ O‘zbekiston Respublikasi Prezidentining 2023-yil 21-dekabrdagi “Mahalla institutining jamiyatdagi rolini tubdan oshirish va uning aholi muammolarini hal etishda birinchi bo‘g‘in sifatida ishlashini ta’minlashga qaratilgan chora-tadbirlar to‘g‘risida”gi PF–209-son Farmoni ijrosi doirasida mahalla tizimida amalga oshirilayotgan ishlar o‘rganildi.
🇺🇿 Xalq deputatlari Parkent tuman Kengashiga 4-“Bo‘ston” saylov okrugidan saylangan deputat Usipxodjayev Yerlan Ormanovich tomonidan o‘zi saylangan saylov okrugidagi “Qirg‘izovul” mahalla fuqarolar yig‘inida mahalla raisi faoliyati hamda “mahalla yettiligi” tomonidan amalga oshirilayotgan ishlar deputatlik nazorati tartibida o‘rganildi.
✅ O‘rganish davomida mahalla raisi Jumataeva Nargiza Abduxaliyevna bilan suhbat o‘tkazilib, Farmonda belgilangan vazifalar ijrosi, mahalla obodligini ta’minlash, “Obod mahalla”, “Obod ko‘cha” va “Obod xonadon” mezonlarini hayotga tatbiq etish, aholining faolligi va mas’uliyatini oshirish borasidagi ishlar muhokama qilindi.
✅ Shuningdek, mahalla raisi tomonidan “mahalla yettiligi” a’zolari faoliyatini muvofiqlashtirish hamda ularning o‘zaro hamkorligini ta’minlashga e’tibor qaratilayotgani qayd etildi. Ayni paytda mahallada xatlov ishlari tashkil etilgan bo‘lib, ushbu jarayonda aholi xonadonlaridagi mavjud holatni o‘rganish, fuqarolarning ehtiyojlarini aniqlash va mahalladagi dolzarb masalalarni belgilab olishga alohida ahamiyat berilmoqda.
🌱 Bundan tashqari, “Yashil makon” umummilliy loyihasi doirasida daraxt va buta ko‘chatlarini ekish, hududlarni obodonlashtirish hamda aholining ekologik madaniyatini yuksaltirishga qaratilgan targ‘ibot ishlarini tashkil etish masalalariga ham e’tibor qaratildi.
✅ Mahalla raisi va “mahalla yettiligi” faoliyatini muvofiqlashtirish, aholi muammolarini o‘z vaqtida aniqlash hamda ularning yechimi bo‘yicha manzilli ishlarni tashkil etish mahalla institutining samarali faoliyat yuritishida muhim ahamiyat kasb etadi.
✅ Deputatlik nazorati doirasidagi bunday o‘rganishlar mahallada amalga oshirilayotgan ishlar samaradorligini oshirish, belgilangan vazifalar ijrosini kuzatib borish va aholi manfaatlarini ta’minlashga xizmat qiladi.